Hirit ni Rama

Makamugna lamang og dakong kagubot ug kalibog sa mga residente sa dakbayan sa Sugbo ang pag-insister ni kanhi mayor Michael Rama nga siya gihapon ang mayor sa siyudad bisan pa sa iyang pagka-dismiss sa serbisyo tungod sa nepotismo.

Sa pagkakaron, aduna na’y mayor nga nagdumala sa mga kalihokan sa syudad, ug ang pagpadayon ni Rama pag-angkon sa posisyon dili makahatag og kaayohan sa katawhan ug sa dakbayan.

Ang pagrespeto sa balaod maoy pundasyon sa usa ka demokratikong sosiyedad.

Ang desisyon sa Ombudsman nga nag-dismiss kang Rama tungod sa nepotismo usa ka klaro nga mensahe nga ang pag-abuso sa gahum dili angay pasagdan.

Ang pag-insister ni Rama nga siya gihapon ang mayor, bisan pa sa klaro nga desisyon sa Ombudsman, nagpakita lamang nga wala siya magpakabana sa balaod ug sa proseso sa hustisya.

Dili nato ikalimod nga ang pagpadayon ni Rama sa iyang pag-angkon sa posisyon magdala lamang og kalibog ug moresulta sa pagkabahinbahin sa komunidad.

Angay nga magtinabangay ang tanan aron masiguro nga ang syudad magpadayon pag-uswag.

Angay hinuon magpakita si Rama og respeto sa desisyon sa Ombudsman ug sa kasamtangang mayor nga nagdumala sa syudad.

Ang paghatag og higayon sa bag-ong liderato nga magpadayon sa ilang mga plano ug programa alang sa kaayohan sa tanan mao ang labing maayong buhaton sa kanhi mayor.

Ang pagpadayon sa pag-angkon sa posisyon dili lamang makadaot sa politikanhong imahe ni Rama. Makadaot usab kini sa siyudad sa kinatibuk-an.