Kwarta giusik-usikan

Ang gihimo ni Vice President Sara Duterte nga nanghatag og kwarta sa mga school’s district superintendents ug ubang opisyal sa Department of Education (DepEd), gikan sa intelligence funds, maayo ba?

Makaingon ta nga kaswerte gud sa maong mga opisyal sa DepEd nga nakadawat. Dagko pa kaayo sila og sweldo unya gipanghatagan pa’g dagkong kantidad sa kwarta gikan sa kagamhanan.

Masabot man gud nimo nga baliwala ra ni Sara ang paghatag og kwarta kay dili man gikan sa iyang bulsa, dili man niya hinagoan.   

Nabutyag kining maong mga inpormasyon tungod sa nagpadayon nga pakisusi nga gihimo sa Kongreso pinaagi sa House Committee on Good Government and Public Accountability.

Pastilan, makapanguros ka sa kasayuran nga gibutyag ni Gina Acosta, ang Special Disbursing Officer (SDO) sa Office of the Vice President kay gimandoan kuno siya ni Sara nga itugyan ang P125 million nga confidential funds ngadto kang Colonel Raymund Dante Lachica kaniadtong 2022.

Si Koronel Lachica maoy pangulo sa Vice Presidential Security and Protection Group (VPSPG). Ambot og giunsa sab paggasto ang maong kwarta nga pwerteng dakoa.

Basta dili lagi imong kwarta, way sakit sa dughan bahala na’g mahurot sa paggasto.

Kining pagpaturagas lang paggasto sa kwarta sa kagamhanan, tan-aw nako usa ni sa makadaot sa tinguha ni Inday Sara nga magpresidente unya sa 2028.

Kini ra ba gyud unta si Inday Sara maoy gusto nakong mahimong presidente kon midayon pa siya’g lansar. Alang sa mga opisyal sa gobiyerno dili usab unta mo magpaturagas na lang paggasto sa kwarta sa katawhan uy.

Sigurado ko nga sa sunod hearing sa Kongreso, ipatawag nila si Koronel Lachica aron sutaon kon giunsa niya paggasto ang maong kwarta nga gitugyan kaniya pinaagi sa kamandoan ni Inday Sara.

Mao diay nga ang P125 million nga confidential funds nga gihatag gikan sa opisina ni Presidente Marcos ngadto sa Office of the Vice President kaniadtong 2022, gigasto lang kuno sulod sa 11 ka adlaw.

Duna pay giingon nga ang OVP migasto og P16 million isip bayad sa “safehouses” nga nakapatingkag sa kilay sa mga nasayod sa balita.

Matud pa nga kada adlaw mogasto og kapin sa P200 mil pesos sa safehouse. Grabeha.

Apan ang kampo sa mga Duterte nagtoo nga mora’g gigukod sila sa administrasyon ni Bongbong Marcos. Gani si kanhi Presidente Duterte mora’g nanawagan na sa militar nga moalsa.

Pero tan-aw nako, utokan sab ang katawhan nga makasabot kon unsay maayo, ug unsay dili.

Daghang problema karon, kay si Digong kon malutsan og warrant of arrest sa International Criminal Court (ICC), basin og dakpon siya ug prisohon.