Mata sa bata nabingwit sa kabilya

Makapakitbi sa atay tan-awon ang nahitabo sa usa ka 10-anyos nga batang lalaki nga natusok ang iyang mata sa kabilya samtang mopadung na unta sa iyang eskwelahan alas onse kagahapon sa udto didto sa Sitio Sto. Niño Barangay Apas dakbayan sa Sugbo. Gani ako dili makaako sa pagtan-aw man lang sa hulagway ug labaw na sa personal nga naa pa ang kabilya sa mata sa batang biktima.

Mao kini ang akong personal nga nakoberan kagahapon diin gihilap sa kaluoy ang akong kasingkasing nga makita ang sitwasyon sa bata nga wala gyud magdahum nga mao ba diay iyang dangatan nga sa iyang tinguha nga makasayo og sulod sa eskwelahan sa iyang shift sa klase didto naman hinuon siya nadala sa tambalanan.

Sumala sa mga nakasaksi nga mao nalang ang iyang nadunggan ang hilak sa bata ug sa iyang pagsusi sa dalan naghangad na kini nga nagkinto kay nabingwit na sa iyang mata ang kabilya nga gitukon unta sa nagyonyon nga wire sa kuryente.

Dali kining giluwas sa mga tawo sa dapit samtang nanawag sila og rescuers kinsa dali ra usab miabot og giatiman ang bata. Naglisod sila sa pagtangtang sa puthaw busa giapil nalang usab nila kini sa pagdala ngadto sa tambalanan aron luwas kini nga matangtang sa kamot sa mga experto sa hospital.

Alang sa ubang mga tawo sa dapit katingad-an ang nahitabo sa bata kay sa kabilya nga sama ka dako sa tudlo sa kamot ug mora’g taga sa bingwit ang tumoy niini imposible nga masulod sa mata ug motusok pa sa tabon tabon o eyelid niini. Nahisama sa usa ka bingwit nga mikaw-it ang taga sa mata sa bata.

Bisan pa man seguro og magdagan dagan ang bata dili gyud kuno mahitabo nga moderesto kini sa eyelid, hinoon sa pagkutlo niining balita wala pa maseguro kong walay danyos ang iyang kalimutaw o eyeball sa bata.

Luoy intawon ang kahimtang niini kay tua diay sa layo ang gininahan ug ang iyang igsuon ang nag-atiman kaniya. Busa gitawagan nako ang Department of Social Welfare Services aron ipaabot ang sitwasyon sa bata ug dihadiha dayon miaksyon sila. Matud ni Portia Basamayor, ang ilang pangulo, nga atimanon nila ang panginahanglan sa bata sa tambalanan.

Sa nahitabo sa bata wala bay tulobagon ang nagbutang sa tukon sa wire nga mao man kini ang nakadisgrasya. Aksidente man gyud ang nahitabo apan kong gitarong pa lang unta kadto og butang ang kabilya dili gyud unta mosangpot sa disgrasya. Sa pagpasagad gyud sa uban maamong usab ang kinabuhi sa mga inosente.

Ikaduha na kini sulod lang niining buwana diin niadtong niaging semana lang adunay 10-anyos usab nga batang lalaki ang natuhog ang bukton sa puthaw nga grill human masangit dihang nikuha siya sa sapatos nga nalagpot sa atop sa iyang silingan. Maayo gani kay nadali sa pag-rescue ug nadala sa tambalanan.

Moingon ang uban nga gakiat lang ang mga bata maong madisgrasya. Dili nato sila puwede basolon sa nahitabo nila kay ang ingon niining edara kiat gyud. Busa gikinahanglan silang giyahan aron malikay sa mga peligro nga posibleng masinatian.