EDITORYAL - Kinahanglang mosanong

Mga opisyales ubos sa Office of the Vice President kinahanglang mosanong sa imbitasyon sa congressional inquiry on good governance and public accountability nga nagiimbestigar bahin sa paggamit sa pundo sa maong buhatan.

Mao kini ang buot mahitabo sa mga miyembro sa maong komitiba nga naghimo og makuting imbestigasyon kun giunsa paggastos sa maong buhatan ang pundo para niini nga gipangulohan ni Bise Presidente Sara Duterte.

Dunay pito ka mga OVP officials nga gipadad-an og subpoena apan wala sila nanambong kay adunay mga lakaw ug uban pang rason.

Matud pa sa report sa One News, ang usa sa giimbitar nilarga sa US niadtong Nobiyembre 4.

Matud pa sa samang report, ikalima na kini nga imbitasyon nga gihimo, kaupat sila wala mosanong.

Ang inquiry in aide of legislation kini, apan ang OVP mihulagway nga ilegal, daghan og iregularidad ug wala nay kalabutan sa pagpanday og mga balaudnon ang gihimo sa mga miyembro sa komitiba.

Mahimong sakto ang OVP sa ilang komento, kay duna may mga pagduda nga naimpluwensiyahan ni House Speaker Martin Romualdez ang komitiba kinsa giisip karon nga posibleng makaatbang ni Duterte sa 2028 presidential elections.

Apan usa sa mga tahas sa mga magbabalaud nga siguraduhon nga ang kwarta sa katawhan gigamit sa husto.

Kahinumdoman nga gikwestyon si Duterte bahin sa iyang milyones ka pesos nga confidential funds nga sud lang sa pipila ka adlaw nahurot.

Ang Pilipinas dili adunahan nga nasud nga makahatag dayun sa mga panginahanglan sa katawhan, busa dili mahimong waldason lang ang pundo ni bisan kinsang gisaligan niini. Kinahanglang manubag sa katawhan ang tanang opisyales sa gobiyerno bisan kinsa pa kini.

Dapat dili dawaton sa mga Filipino ang mga panultihong "bawos-bawos lang," "sa makapabor lang," o ba kaha "parehas ra na sila, way mapili.'

Kini tungod kay daghang mga Filipino nga tabangunon kaayo ug kining kwarta iya sa mga magbubuhis nga angay gamiton sa tarong ug di mapaingon sa dili mao.