Pagseguro sa kadaugan

Adunay balaodnon nga gipasaka sa Senador Imee Marcos, ang Senate Bill 2816, kansang katuyoan mao ang pag-oktaba sa 2025 Barangay ug Sangguniang Kabataan Elections (BSKE) ngadto na sa Mayo 2029.  Kon mapasar, malugwayan ang termino sa mga opisyales sa barangay ngadto sa unom ka tuig.  Mag-unsa man ang taas nga termino kon walay proyekto o programa nga mapatuman ang mga barangay official tungod sa kakulang sa pundo sa barangay?  Matud pa sa akong amigo, “Sa tinuoray lang, giumol ang maong balaodnon aron lang gyud maseguro ang kadaugan sa mga nasyonal nga kandidato sa panahon sa eleksyon.”  Muleeng!

Lain ang nasugoan

Giawhag ni Presidente Marcos, Jr. ang mga kagamhanang lokal nga mopalit og palay (unhusked rice) gikan sa mga mag-uuma aron madugangan ang ilang ginansya ug maseguro usab nga adunay igong suplay sa bugas ang nasud. Tahas sa National Food Authority (NFA) ang pagpamalit og palay gikan sa mga mag-uuma ug dili sa mga lokal nga kagamhanan busa mora’g nasuhi kining awhag sa presidente.  Makapahinumdum sa sugo sa akong inahan nga nag-ingon, “Ikaw na la’y pangutang og bugas didto sa tindahan kay mora’g wa man magkadima-o ang imong manghod nga akong gisugo.”  Fezteleern!

Tungod sa wali sa pari

Panghingusgan na sa Cebu City Anti-Mendicancy Board (CCAMB) ang pagpatuman sa City Ordinance No. 1631 o ang Anti-Mendicancy Ordinance, ang ordinansa nga nagdili sa pagpangayo ingon man sa paghatag og limos labi na ngadto sa mga piskay pa ang panglawas.  Hata-hata ug dili makanunayon ang pagpatuman niini’ng maong ordinansa nga daw nagpadayag hinoon sa labing dako nga isyu sa hinungdan ngano nga adunay makililimos ug ngano nga adunay mohatag og limos.  Matud pa sa akong amigo, “Basta dili moundang ang mga pari pagwali nga ‘mahilangit ang manggihatagon’, magbalik-balik ra gihapon ang maong suliran.”  Madahaan!                        

Motuo gihapo’g wakwak

Gitataw sa Bureau of Fisheries and Aquatic Resources 7 (BFAR) nga ang pagdagsa sa isdang tuloy didto sa baybayon sa Basdiot, Moalboal, Cebu wala magpasabot nga adunay umaabot nga katalagman.  Ang posibleng hinungdan mao nga gilutos ang maong mga isda sa laing dagko nga mga isda nga buot mosubad niiini.  Lisod sabton ang kinaiya ug hunahuna sa tawo.  Inay magpasalamat sa grasya nga midagsa sa ilang kabaybayonan, naghunahuna na hinoon nga adunay modangat nga katalagman.  Mao na’y giingon nga, “Niabot na lang ang tawo sa buwan, motoo gihapon kita og wakwak.”  Atala lagee!

Pakyas nga saad

Gipahinumduman ni Presidente Marcos, Jr. ang Department of Agriculture (DA) ug ang National Irrigation Administration (NIA) nga ipatuman gayod ang saad sa iyang administrasyon nga barato’ng bugas alang sa katawhan pinaagi sa pagpalambo sa P29 Rice-for-All program ingon man sa pag-establisar og dugang mga Kadiwa ng Pangulo centers.  Bisan sa kamanduan sa presidente, mahal pa gihapon ang bugas ug padayon pa’ng gihandum sa katawhan ang gisaad nga pagbarato niini.  Makapahinumdum sa linya sa awit ni Greg Macquin nga nagkanayon, “Gihimo mo ang saad, aron lang pakyason.”  Pagkatoytoy!