EDITORYAL - Kuwang sa nutrisyon

Sa panahon karon halos tanang pagkaon sa mga bata ilabi na sa mga urban areas mga “instant” ug processed food na tanan, kanang gikan sa mga pabrika ug kada adlaw nila kining kaunon ug dili kini maayo sa ilang panglawas hangtud sa ilang pagtubo.

Matud pa sa report sa Business World, nagkadaghan ang mga batang obese o kanang sobra katambok ug ilang timbang base sa ilang edad ug gitas-on. 

Sumala pa sa Expanded National Nutrition Survey (ENNS) sa Department of Science and Technology-Food and Nutrition Research Institute, niadtong tuig 2003 nakatala og 4.9 percent sa mga kabataan ang obese, nidoble kini sa tuig 2018 nga 11.6 percent ug paglabay sa tulo ka tuig (2021) niabot kini og 13 percent.

Kaning sobra ang timbang epekto kini sa sobrang deposito sa tambok diha sa lawas. Ang Obesity usa kini ka matud chronic complex disease o sobra sa katambok nga nakaapektar na sa panglawas.

Ang World Health Organization (WHO) nipasidaan nga ang sobra-sobra og timbang mao gyuy sagad hinungdan sa sayong pagkasakit sama sa type 2 diabetes ug cardiovascular disease o sakit sa kasingkasing.

Usa sa hinungdan niini kaning pagsig’g kaon og dili sustansyadong pagkaon, kakulang sa ehersisyo o physical activities tungod kay nagsige nalang og duwa sa gadgets o cellphones.

Nakatampo sab niini kining kamahal sa presyo sa mga produktong presko sama sa mga utanon, prutas, lamas ug uban pa.

Katapulan sa mga ginikanan pagluto og mga sustansiyadong pagkaon para sa mga anak o ba kaha wala na silay oras pag-andam niini tungod sa ilang trabaho.

Kada bulan sa Hulyo ang National Nutrition Month iselebrar pinaagi sa  National Nutrition Council (NNC) subay sa Presidential Decree No. 491, o Nutrition Act of the Philippines nga napasar niadto pang 1974.

Apan base sa mga numero sa gidaghanon sa mga batang obese sa Pilipinas, mura og wala gyud kaayo motuhop kining balaura.

Tingali kinahanglang seryusohon sa mga LGUs ang mga programa niini tibuok tuig ug dili lang kada bulan sa Hulyo. Pangusgan bisan kanang backyard gardening aron di magsalig sa merkado ang mga tawo, himuong kompetisyon aron maengganyo ang tanan ug dasigon ang tanan nga mag-ehersisyo.