Konsiderasyon lang sa manaygonay

Usa sa giatangan natong panahon sa Pasko kining daygon. Ang mga tawo nga manaygon ug ang mga tawo nga daygonan daw dili makompleto ang Pasko kong dili nato masaksihan kining atong naandan nga kabahin na sa atong kultura.

Hangtud karon anaa pa sa akong panumduman ang mananoy nga tingog sa kanta sa Pasko gikan sa mga manaygonay nga maoy mamukaw sa oras tingkatulog didto sa probinsiya nga dan-agan usab sa suga sa tagbalay.

Hinuon dili tanan ingon niini nga naa man say magpatulog tulog kay dili man mohatag o wala lang puy ikahatag.

Naa pa man ni karon sa probinsiya. Gani ang uban gikan sa maong dapit o kadtong gikan sa bukid molugsong man sa patag o syudad kay nagtuo nga dagko mohatag ang mga tawong daygonan pero bali kaayo kay sinsilyo ra man, mao pa ganiy pagsugod og kanta tunolan naman og kwarta kay alang sa uban disturbo.

Bitaw, kining mga manaygonay ang apektado sa gipatuman karon sa Cebu City nga "No Permit No Carolling" policy, ang managygon nga walay permit gikan sa City Hall ug kadtong mohatag parehong silotan hatagan og citation.

Tumong ani nga ma-regulate ang mga manaygonay.

Atong i-classify ang mga lehitimo nga manaygonay ug ang mga mendicants nga magsaoysaoy sa kadalanan ug mosaka sa mga sakyanan kay mangayo og kwarta, dili na panaygon ang ilang gihimo pagpakilimos na kana busa angayan nga panghiposon sila.

Pero kining mga tinuod nga manaygonay dili nalang hasolhasolon sa pagkuha og permit kay maayo man ang ilang tumong ug dili usab sila magpakilimos.

Kong tinarong ang ilang himoon hatagan nato og kahigayonan nga mapadayag ang diwa sa Pasko.

Alang sa mga taga probinsiya nga molugsong sa siyudad bug-at na kini nga requirements alang kanila ilabi na nga wala silay kabangkaagan kaayo sa proseso.

Unta mahunahunaan sa LGU nga hatagan og konsiderasyon ang mga manaygonay ug dili lisod lisoron sa ngalan sa Pasko ang panahon sa adlaw sa atong Ginoo.