Ang tubig kinabuhi

Tan-aw nako, mora’g makabentaha gyud sila si Cebu City Mayor Raymond Alvin Garcia ug si Atty. Joey Daluz kon ang pagkabig og mga botos sa kabukiran sa north district ang hisgotan.

Ang pagmugna sa Lusaran Water Project nga ang tubig gikan sa sapa sa Barangay Lusaran gi-process aron malimpyo, ug isuplay sa MCWD nahimo atol nga si Daluz maoy chairman.

Si Atty. Daluz maoy chairman sa MCWD nga gikontrata niini ang JE Hydro & Bio-Energy Corporation aron maoy mohimo sa Lusaran Water Project.

Gisiguro gyud ni Daluz ug sa mga sakop sa MCWD Board nga ang linya sa tubig, moagi sa mga barangay sa bukid lahos na sa Barangay Busay.

Pwerteng daghana nga mga barangay nga giagian sa linya sa tubig, ug makapahimu’s usab og abunda nga tubig kay mataoran na man sila og mga linya paingon sa ilang balay.

Sama namo diri sa ibabaw nga bahin sa Barangay Apas, ug diri sa Busay, pwerteng kusoga sa among tubig nga moagas sa among gripo tungod sa Lusaran Water Project.

Nganong miingon ko nga mora’g makabentaha sila si Mayor Garcia ug Daluz? Pareho sila nga nagpapili para sa election karong sunod tuig. Si Garcia pagka mayor ug si Daluz pagka vice mayor.

Ang MCWD mikontrata og unom ka kontraktor nga maoy manaod og mga dagkong tubo sa tubig ngadto sa mga hilit nga dapit sa kabarangayan nga giagian sa Lusaran Water project.

Ang mga barangay mao ang Lusaran, Agsungot, Pit-os, Pulambato, Talamban, Busay, Apas, ug daghan pa. Apan unsaon, duna may opisyal sa City Hall nga milangan sa pag-aprobar sa permit sa mga MCWD contractors.

Naabtan og mga usa ka tuig nga wa makalihok ang water expansion project sa MCWD, ug diha na kini napirmahan dihang mibanos sa pagka mayor si Raymond Garcia

Sigurado ko nga inig-abot sa eleksyon, ang mga lumolupyo sa nahisgotang barangay makapataod na og koneksiyon sa tubig ug ang tubig gikan sa Lusaran mahiabot na sa ilang panimalay.

Tungod kay dili na man magkalisud-lisud ang katawhan sa bukid sa pag-agwada og tubig gikan sa mga tinubdan, o kaha mga atabay, magpasalamat gyud sila nilang Garcia ug Daluz.

Si Mayor Michael Rama nga nagpapili usab pagbalik pagka mayor sa siyudad, mora gani og maapektohan niini nga isyu, kay ang wa pag-aprobar dayon sa permit sa MCWD, gihimo man atol sa iyang administrasyon.

Ambot og unsaon kaha pagpasabot sa kampo ni Rama kon mangutana ang katawhan nganong gilangay man sa iyang administrasyon ang pag-aprobar sa permit sa MCWD contractors.