Bulak-kandila-pag-ampo sa kalag, igo na

Nobiyembre 1 ug 2, 2024. Gisaulog na usab sa mga buhi ang piyesta sa mga minatay sulod sa mga sam-ang.

Segun sa akong mahinumdoman, niadtong bata pa ko ug magkuyogkuyog sa akong apohang mananabtan, daplin sa dalan maglaray ang namaligyag humba, adobong baboy o manok, bulad, tsinelas, sinina ug uban pa. Basta, namaora’g taboan-peryahan na ang maong lugar.

Ang nakaayo lang kay bisag walay nagbantay’ng polis, nasinati gihapon sa katawhan ang kaluwas diha sa pagpanagkot ug paghalad didto sa mga bungdo og mga bulak, kandila ug pag-ampo alang sa mga patay uban sa suking mananabtan kang kansag bag sa buntag puno pa sa mga kandila. Pero pag-abot sa kahaponon, hurot na. Aw, makadala gyod og ginabot ug chicharong bulaklak ang akong apohan inig uli namo sa balay.

Hinuon, kaniadto wala pa matawo ang shabu. Mao nga bisag mag-awas-awas pa sa kadaghan ang mga tawong mosulod-gawas sa menteryo, layo ra sa kakuyaw ug kagubot ang palibot. Kay sagad dad-on sa mga Katolikong magtutuo, pulos mga bulak, kandila ug pag-ampo ra gyod. Hinuon, may magdalag mga pagkaon, pero kadto lamang mga pamilyang tubigtubigan.

Apan yuna pa, kinahanglan bang halaran gyod og pagkaon ug ilimnong makahubog ang mga patay? Makatabang ba kini sa pagluwas sa ilang kalag nga hangtod karon mopadamgo kanato nga naglangoy pa gihapon sila sa halapad-dakong lawod sa kasakit ug nagpanawag og tabang natong mga buhi aron sila maluwas?

Alang nako, dili pagkaon o ilimnon sa lawas nga makadaot-patay sa kalag ang angay igasa kanilang mga patay. Kondili, pagkaon o ilimnon nga mao ang kinasingkasing pag-ampo natong mga buhi, nga makapahimsog sa ilang kalag, makalinis sa tanang nahibiling sala, makapalingkawas kanila sa purgatoriyo ug mao nay puy-an ang gingharian sa Diyos hangtod sa kahangtoran.

Dili ba miingon ang Ginoo, nga mangayo lamang kitag pasaylo Kaniya kay kita Iyang pasayloon? Tinuoray, dili na Siya maminaw sa mga patay, pero mamati Siya sa pag-ampo natong mga buhi. Nan, dakong posible nga kon kita mag-ampo nga unta pasayloon ang igsuon natong namatay, kinsa nakalimot pagpangayog pasaylo tungod sa iyang kalit nga kamatayon, seguradong dunggon Niya atong pangilaba.

Ug maluwas ang kalag sa purgatoriyo nga atong giampo.