Ang mga kaabag sa Eksorsista (Katapusang bahin)

7. Mga hiyas sa mga himoong kaabag sa eksorsista

a. Halawom nga kinabuhi sa pag-ampo nga sa ato pa ang ilang presensiya pa lang daan, kasinatian na sa pag-ampo ug pagtuo. Kini tungod kay dili makatandog ang yawa sa mga tawong maampoon.

b. Maligdong nga pagkinabuhi nga sa ato pa ang maong mga kaabag nagpuyo gyud sa kinabuhi subay sa balaod sa Dios ug sa iyang Simbahan inubanan sa mga maayong buhat ug panig-ingnan.

c. Nakadawat sa espirituhanon ug katekesis nga pag-umol. Uban ang pagtudlo ug paggiya sa eksorsista ang mga kaabag kinahanglang dunay husto nga pagsabot ug kahibalo sa pagtulon-an sa simbahan kalabot sa mga butang dunay kalambigitan kalabot sa pagtuo sanglit ang yawa maningkamot man sa pagtay-og sa pagtuo sa mga tawo nga nalambigit ning maong buhat. Kun mahuyang sa pagtuo mahimong maapektuhan usab ang kinabuhi sa pag-ampo.

d. Pagkamapaubsanon, malumo ug masinugtanon. Ang kaabag kinahanglan nga dili magmasinupakon sa mga pahimangno sa eksorsista ug dili magpakita og taras nga makadaut o makabungkag sa pundok.

e. Kasaligan sa mga butang o impormasyon. Ang mga panghitabo, kasauran kalabot sa biktima kinahanglan tipigan ug ampingan agig pagtahud sa pasyente kun biktima. Ang matag kaabag maantigong motipig niini ug silyado ang ilang baba aron ang bisan unsang kasayuran dili mapakaylap ngadto ni bisan kinsa labina sa bisan unsang paagi o kahimanan sama sa media.

f. Ang kaandam nga mobulig sa eksorsista sa iyang mga gimbuhaton sa walay hunong. Ang kaabag kinahanglan dunay kasayuran sa petsa, adlaw o takna ang eksorsista modawat og mga pasyente ug motabang sa pagpahigayon sa maong mga kalihukan nga dili mamahimong babag sa lain pang mga buluhaton sa eksorsista (sama sa buluhaton sa parokya kun padre kura siya). Ug nga ang maong kaabag maantigo usab nga modumala sa personal nga kalihukan niini aron dili mamahimong komplikado sa kalihukan sa pangalagad sa eksorsismo ug kalingkawasan.

g. Praktikal ang kaabag. Nga sa ato pa bisan unsang mga buluhaton gikan sa pag-andam sa mga butang o kagamitan nga gikinahanglan, ang paglimpiyo ug pag-andam sa dapit iyang mahimo uban ang dakong kasayon ug kapaspas.

h. Sikolohikal nga kahimsog. Maantigo siyang modumala sa iyang emosyon, hukom, ug sa iyang kaugalingon mismo. Dili mahimo ang kaabag nga nerbiyoso sanglit ang eksorsismo makuyaw nga buhat. Mahimong mabutang sa kakuyaw ang kaabag ug dili makab-ot ang gipaabot nga resulta nga sa ato pa, pakyas ang tanan.

i. Lawasnong kahimsog. Kay panahon sa kapintas sa nayawaan gikinahanglan kining gapuson o gunitan apan mag-unsa man kun luyahon o masakiton ang lawas nila nga nitabang? Mas maayo gyud ang makanunayong pag-monitor sa kahimsog nila nga nalambigit ning maong matang sa pangalagad aron pag seguro kun angayan ba silang moapil sa aktwal nga eksorsismo.

8. KAAKUHAN SA EKSORSISTA NGADTO SA IYANG MGA KAABAG

a. Pag-umol kanila segun sa panginahanglan sa iyang Pangalagad. Hustong doktrina ug pagtulon-an nga pinasikad sa Balaang Kasulatan ug sa pagtulon-an sa simbahan.

b. Espirituhanong Kahiusahan. Kinahanglang palipangon ang kahiusahan ug pagsinabtanay diha sa pundok sanglit ang yawa magdala man gyud og pagka bahin bahin nga maoy moresulta og kaungkagan.

c. Gawasnon ang eksorsista ug ang kaabag sa pagpaminaway sa usag usa alang sa kalambuan ug paghamtong apan sa katapusan ang eksorsista minandoan sa iyang tanlag ug kagawasan ang mohimo sa hukom aron dili sa tanang higayon siya mag-agad lamang sa iyang mga kaabag.

Mga Praktikal nga Tambag

1. Ang mga kaabag kinahanglang matinahuron, kaduolan ug maabi-abihon sa mga biktima o sa mga pasyente nga niduol aron katabangan.

2. Dili magbuot buot. Kinahanglang mag-agad sa kabubut-on sa eksorsista ug sa iyang mga pahimango.

3. Mag-ampo segun sa gisugo o gimando sa eksorsista nga ilang ampoon diha sa kahilom. Sa aktwal nga eksorsismo ginadili ang paghimo og mga komento samtang nagpadayon pa ang sesyon.

4. Dili sila pwede mangutana o makigsulti sa nayawaan panahon sa eksorsismo hinunoa kinahanglang batonan nila ang kinasingkasing nga pag-ampo alang sa kaluwasan ug kalingkawasan sa biktima.

5. Ginadili ang paggamit og mga pag-ampo panahon sa eksorsismo nga gitagana lamang sa mga eksorsista.

6. Pahimangnoan sa eksorsista ang mga kaabag lakip ang kaparian nga dili eksorsista nga molihok sa mga buhat nga iya lamang sa eksorsista. naglangkob kini sa pagtapion sa kamot sa ulo sa biktima, pagpadayag sa krusipiho ngadto biktima ug uban pa.

7. Ang mga masinupakon ug wala magpakita og pagpaubos ang pagadid-an nga manginlabot sa mga kalihokan sa eksorsismo ug kalingkawasan gawas lamang kun ang hingtungdan adunay dakong tinguha nga bag-ohon niya ang iyang kaugalingon.