Giunay pag guba ang kaugmaon

Kong tinud-on lang gyud sa otoridad ang pagpangita sa mga nagpasiugda sa bomb scare o bomb threat madakpan man gyud diay ang mga nagpasiugda niini. Sama sa gihimo sa National Bureau of Investigation nga nilampos sa ilang paghukas sa maskara sa tawo nga nagpakatap og hulga sa pagpamomba sa Cebu Technological University CTU niadtong niaging Lunes, sumad karong adlawa diin nahunong gyud ang klase ug tanan kalihokan sa tunghaan dihang dunay nag post sa social media nga naay mobuto nga bomba.

Gamit sa suspek ang ngalan sa usa ka lalaki ug naa pay mga hulagway ang iyang post sa mga explosives nga gitanom kuno sa unibersidad. Apan dali ra kaayo siyang nailhan og nadakpan sa mga operatiba sa NBI.

Nasayran nato nga mismo ang NBI Central Office ang nagpadala og mga experto sa Anti-Cybercrime Division nga mianhi sa Sugbo pag-imbistigar sa bomb threat gamit usab ang ilang mga modernong kahimanan.

Nailhan ang suspek nga usa diay ka 19-anyos nga babaye, first year student sa CTU, kinsa gihulagway sa opisyal sa tunghaan nga walay dautang record ug hilomon. Busa nakurat sila nga nakahimo kini og dakong krimen.diin ang bomb threat usa ka seryoso nga sala nga nagtangag og dakong silot.

Natultolan ang gipuy-an niini sa Mandaue City ug didto giaresto ug nakuha usab ang cellphone kansang number ang nasuta sa NBI nga gigamit sa iyang socmed portal diin gihimo ang pagpanghulga.

Pastilan makaluluoy man unta kaayo kining bayhana kay sa iyang pagtuo komedyanra kadto kay lagi wala siya magdahum nga masakpan sanglit daghan naman ingon niini nga kaso nahilom ra man. Apan sayop siya kay nataymingan lang gyud nga ang NBI ang nilihok hinungdan nga nadakpan ug napasakaan gyud og kaso.

Matud pa aduna lang kunoy nagsugo sa suspek nga himoon ang bomb threat apan wala siya motug-an og kinsa. Posible kaha nga nagsulti siya sa tinuod ug paladman pa sa NBI ang pakisusi kay basin naay grupo nga giapilan kining bayhana ug ang ilang pagsuway mao ang pagsabwag og kahadlok pinaagi sa bomba.

Kong akong nahinumduman, managsama og pattern ug bisan linya sa gisuwat sa social media sa bomb scare nga nadawat sa ubang mga tunghaan sama sa UC Banilad kaniadto.

Labing unang higayon kini nga nadakpan ang nagpaluyo sa bomb threat. Hinaut magsilbe kining leksiyon sa mga dunay planong magtisok og kahadlok kay masakpan gyud diay sa kauwahiab ang dautan nga binuhatan.

Walay pagbasol nga mag-una. Kini ang gibati sa babayeng tinun-an nga nakatilaw gyud og bilanggoan. Hinuon makapyansa man siya apan naguba na ang iyang kahigayonan nga maumol ang kinaadman kay segurado dili na siya makabalik sa tunghaan diin siya walay bayad sanglit usa man kini ka state university.