Wala'y gihapo'y pulos

Bisan sa gidahum nga pagkunhod sa produksiyon tungod sa La Nina, aduna gihapoy igong suplay sa bugas ang nasud nga mokabat ngadto sa 3.83 metric tons sa pagtapos sa tuig 2024.  Matud pa usab sa Department of Agriculture, napugngan ang pagkunhod sa suplay tungod sa suporta ug pundo nga gihatag ubos sa Rice Tariffication Law ug sa National Rice Program.  Nagsige lang og pangandak ang mga ahensya sa gobyerno kabahin sa abunda nga suplay sa bugas apan ang gisaad ug gihandom sa katawhan nga barato’ng bugas wala gayod masinati.  Mao kana’y giingon sa taga-Salot nga, “Paleho la man busa wala gihapo’y pulos.”  Fezteleern!

Pobre lang gihapon     

Giaprobahan na sa DBM ang sayo nga pagpanghatag sa yearend bonus ug cash gift sa mga empleyado sa gobiyerno pinaagi sa giluwatan nga Budget Circular 2024-3.  Nabatyagan kuno sa DBM nga kanunay nga madelatar ang pagdawat sa mga empleyado sa kagamhanan sa ilang bonus ug cash gift nga giingon’g naka-apekto sa ilang morale, ug sa ilang motivation.  Tinuod nga hangpon sa mga empleyado ang bonus labi na kon sayo kini ipanghatag.  Tambag sa akong amigo sa mga empleyado, “Hinay-hinay lang unya og gasto sa bonus kay angayan hinumdumang nga pobre gihapon kita.”  Muleeng!

WPS ra ang giangkon                                                                                

Namahayag ang Indonesia nga gipapahawa niini ang barko sa Chinese Coast Guard diha sa giilogan nga kadagatan sa South China Sea sa makaduha ka higayon pinaagi sa pag-intecept ug pagsunod-sunod sa Indonesian Coast guard sa barko sa Chinese Coast Guard.   Kon nakapapahawa ang Indonesian Coast Guard sa barko sa China, ngano’ng dili man kini mahimo sa Philippine Coast Guard?  Tubag-komedya sa akong amigo, “Napapahawa ang China kay wala man nila angkona ang luna sa Indonesia diha sa South China Sea.  Ang ilang giangkon kay ang West Philippine Sea ra man.”  Madahaan!

Mora’g sibuyas-bombay

Segun sa survey nga gipahigayon sa Social Weather Station (SWS) kaniadtong Septyembre 14-23, 2024, 59% sa mga Pinoy ang nagkonsiderar sa ilang kaugalingon nga nagpuyo sa tumang kakabos.  Napadayag sa maong survey ang kabulay-og sa atong mga opisyales ug ang ka-palpak sa mga programa sa kauswagan sa atong kagamhanan.  Mora’g tinuyo na sa atong mga politiko ang pagpabilin sa katawhan nga mga kabos aron sa kanunay ila kini’ng magawngan.   Mao kana’y giingon nga, “Ang pitaka sa mga Pinoy, mapanag-ing sa sibuyas-bombay, kay matag bukas nimo niini, dili kapugngan ang pagtulo sa imong luha.”  Atala lagee!

Persona non intelligencia?

Gideklara sa Borbon Municipal Council ang usa ka residente sa maong lugar nga persona non grata tungod lang kay mipasaka ang naulahi og kaso nga grave misconduct batok sa mayor ug uban’g opisyales sa lungsod.  Ang pagdeklarar gipaagi sa usa ka resolusyon nga gipangamahanan sa konsehal nga anak ra usab sa mayor.  Mora’g dili man tukma kining pagpadayag sa sentimyento sa konseho sa Borbon.  Maayo lang gani kay dili makabawos ang maong residente pagdeklarar sa konseho nga “persona non intelligencia” tungod sa dili makinaadmanon niini nga resolusyon. Pagkatoytoy!