EDITORYAL - Chinese Ambo: “Easy win”

Wala nay lain pang rason para dili palayason ang Chinese Ambassador to the Philippines nga si Jing Quan human kini namahayag nga ‘easy win’ para nilang mga Chinese kung gusto nilang pwersahon ang Pilipinas bahin anang isyu sa West Philippine Sea.

Mismo si Presidente Ferdinand Marcos Jr. giisip ang pamahayag ni Jing nga usa ka hulga sa Pilipinas. Naa pa bay lain? Kanang pamahayag nga sama niini dili iya sa usa ka diplomat, pamahayag kana nga sagad magagikan sa usa ka estambay sa karsada nga palaaway.

Gipamahayag kini ni Jing atol sa iyang mensahe Diliman College sa Quezon City. Usa ka adlaw human nga giakusahan ni Defense Secretary Gilberto Teodoro  Jr. ang China nga ‘troublemaker’ nga maoy nagsige og mugna og kasamok ug kagubot diha sa West Philippine Sea.

Dunay katungod si Teodoro mamahayag og ingon niana isip maoy gitahasan sa pagsiguro sa depensa sa nasud nga maprotektahan ang teritoryo ug soberiniya sa Pilipinas.

Wala sa linya si Jing para mobuhi og sama niana nga pamahayag. Isip ambassador sa China, siya ang representante sa ilang nasud dinhi para sa diplomatikong relasyon.

Ang numero uno niyang trabaho mao ang pagpasabot sa ilang baruganan ug dili para tayhupan ang nagdilaab na nga pugon. Parehas ran i sa iyang gihimo pagatake kang PCG Spokesman for WPS nga si Commodore Jay Tarriela sa una.

Kanang iyahang sumpay pamahayag human sa iyang giingong “easy win” kung gustohon gyud sa China, nga mas gipili nila ang kalinaw—usa lang kana ka takuban.

Kay sa pagkatinuod, ang naa sa iyang kasing-kasing mao ang intensiyon nga ipaabot ang mensahe nga kayang irukon sa China ang Pilipinas bisan unsang orasa nila gustohon.

Walay lugar sa diplomatikong pakiglambigit ang mga ingon niana manghunahuna. Mas maayo tingaling ang posisyong huptan ni Jing naa sa People’s Liberation Army ug dili sa diplomatic corps sa ilang nasud.

Bisag unsa pay isumpay ni Jing sa una niyang gipamulong, walay kwenta o way bili sa kahulogan. Tataw kaayo nga gihulga niya ang seguridad ug kaluwasan sa mga Pilipino.