Pimentel batok Duterte
Kon mag-abot silang kanhi Presidente Rodrigo Duterte ug Senate Minority Leader Koko Pimentel ugma, Lunes, Oktubre 28, sa pagsugod sa imbestigasyon sa Senado sa extrajudicial killings (EJKs) sa drug war ni Duterte, posibleng dako ang papel nga huptan sa ilang panag-ilogay og politikanhong partido. Ambot pila ray mahinumdom nga ang Partido Demokratiko Pilipino (PDP), nga giilog ni Duterte gikan ni Pimentel niadtong 2021, sa Sugbo gitukod ni anhing Senate President Nene Pimentel (amahan ni Koko) sa pagsulbong sa nasudnong mga protesta batok sa diktadura ni Ferdinand Marcos Sr. niadtong 1982.
* * *
Mga Sugboanon ang nitabang ni Pimentel pagtukod sa PDP. Si Antonio Cuenco ang unang chairman samtang si Ribomapil Holganza Sr. ang unang secretary general. Ang unang national convention gitambongan sa isog nga mga delegado sa Sugbo, Cagayan de Oro ug Davao. Walay apil si Duterte nga third assistant prosecutor sa Davao City niadtong higayona.
Nisugyot si Holganza nga ang partido nganlan og Katipunan pasidungog sa rebolusyon batok sa mga Katsila. Gipalabi sa mayoriya ang pagpabilin sa ngalan nga PDP. Naaprobahan hinuon ang pag-apil sa imahe ni Lapulapu sa logo.
* * *
Bisan sa pasiunang pagsupak ni anhing Senador Noynoy Aquino, naaprobahan ang paghiusa sa PDP ug sa iyang Lakas ng Bayan (Laban) sa samang tuig. Ang PDP-Laban nahimong kabahin sa administrasyon ni anhing Presidente Cory Aquino. Unang nabuak ang PDP-Laban niadtong 1988 ngadto sa grupo ni Pimentel ug sa grupo ni Jose Cojuangco Jr. Si Cojuangco nakig-alyansa ni House Speaker Ramon Mitra Jr. ug natukod ang Laban ng Demokratikong Pilipino (LDP). Nga karon gipangulohan na sa mga Angara.
* * *
Nilig-on ang PDP-Laban pagka presidente ni Duterte sa 2016. 123 ka kongresista ug 300,000 ka politiko ang nibalimbing sa partido. Pero nabuak na sang PDP-Laban sa 2021 dihang gikuwestiyon ni Manny Pacquiao ang pangurakot sa administrasyon ug kahilom ni Duterte sa panghasi sa China sa West Philippine Sea.
Giila sa Commission on Elections ang liderato ni Duterte sa PDP-Laban. Sa Sugbo nila gibalik karong tuiga ang orihinal nga ngalan nga PDP, wala nay Laban. Modangop si Pimentel sa Korte Suprema pagkuwestiyon sa pangilog ni Duterte. Mas dako hinuong problema ang tukion sa ilang engkuwentro sa Senado ugma.
* * *
- Latest
