Persons without discount

Mipagawas ang Department of Justice og legal opinion nga nagtataw nga ang 20% nga diskwento ug ubang exemptions nga gihatag sa mga PWD mo-apply lang sa kinatibuk-ang kantidad sa pagkaon kon matino nga ang pagkaon eksklusibo nga nakunsomo ug alang lang gyud sa usa ka PWD. Ni’ng katin-awan sa DOJ, nahiktin ang gipahimuslan kanhi sa mga PWD nga diskwento sa pagkaon sa higayon nga mobangka sila sa ilang mga barkada.  Tungod niini, angay na ilisan ang kahulogan sa PWD, inay Persons With Disabilities, mahimo na kining “Persons Without Discount.” Madahaan!

Kandidato nga pro-China

Nasuta pinaagi sa survey sa Pulse Asia nga 7 sa 10 ka botanteng Pinoy dili mosuporta sa mga kandidato nga pro-China karong 2025 elections.  Nagpasabot kini sa kakulang sa mga Pinoy sa pagsalig sa maong matang sa kandidato.  Wala matataw kon unsay basehan sa paghingalan sa kandidato nga pro-China.  Apan matud pa sa akong amigo, “Sa sistema sa atong eleksyon diin kwarta maoy gisimba sa katawhan, dako’g purohan nga dili matinuod ang maong survey.  Busa adunay kandidato nga gawas nga pro-china, ang apelyido kay inintsik gyud sama sa Go, Tan, Chan, Cojuangco ug uban pa.” Paleho          la!

Mo-surikbot sa ayuda

Gidayeg sa pangulo sa United Nations Office for Disaster Risk Reduction (UNDRR) nga si Kamal Kishore, ang people-centered approach nga pamaagi sa Pilipinas sa pag-atubang sa mga katalagman diin tungod niini, nag-una na ang Pilipinas sa disaster reduction response curve.  Mora’g dili man kompleto ang obserbasyon ni Kishore. Kay matud pa sa akong amigo, “Dili lang kay maayo ang atong gobyerno mopahigayon sa disaster response, mas labing maayo pa gyud ang gobyerno mo-surikbot sa ayuda sa kagamhanan nga alang unta sa mga nabiktima sa katalagman.”  Fezteleern!

“Aay, na-send”

Namahayag ang mga opisyal sa Malacanang nga dili mohatag ang kagamhanan ngadto sa International Crimina Court sa mga kasayuran nga nakutlo gikan sa quad committee investigation sa extrajudicial killlings (EJK) atol sa panahon sa Duterte administration.  Ambot kon matinud-anon ba ang Malacananc, apan gituohan sa uban nga mao kini ang katuyoan sa paglutos ug pagtuki sa kagamhanan kabahin sa mga kasaypanan sa miaging administrasyon.  Sa teknolohiya karon, daghan ang paagi nga mahatagan ang ICC og access sa mga kasayuran.  Matud pa bitaw sa sagad sa mga netizen nga nasayop kunohay pag-send sa impormasyon, “Aay, na-send man.”  Ateerr!

Napuno ang baba

Nasayran sa Presidente Anti-Organized Crime Commission (PAOCC) nga ang mga Pinoy nakat-on na sa pagpahigayon ug mao na’y nagdumala sa mga kalihokan sa Pogo nga gibiyaan na unta sa mga langyaw nga operators.   Dili na ikahibulong kining pamahayag sa PAOCC.  Ang angay kahibudngan ngano nga wala sila’y gihinganlan nga mga tawo nga nagpaluyo sa maong pag-take over sa mga Pinoy sa Pogo.  Sa kadako sa maong matang sa pangwarta, dako ang kahigayonan nga adunay mga opisyales sa kagamhanan nga nagpaluyo.  Ni’ng kahimtanga, haum ang panultihon nga, “Maglisod pagsulti ang bâbâ kon napuno kini sa pagkaon.” Pagkatoytoy!