Dili luwas ang alyansa

Sa labing unang higayon, wala himoa ni Presidente Marcos si Bise Presidente Sara Duterte isip caretaker sa nasud samtang mobiyahe ang presidente ngadto sa nasud sa Laos aron motambong sa ASEAN summit.  Dayag na gyud ang panagbuwag sa duha ka pwersa nunot sa pamahayag sa Bise Presidente nga dili na gayud ang pamilyang Duterte makig-alyansa sa banay’ng Marcos.  Nagkabuwag na gayod ang “bunot” ug ang “bagol”.  Haum ang panultihon nga, “Dili gayod luwas ug segurado ang alyansa sa mga tawo’ng gamhanan.”  Muleeng!

Balaod sa demonyo

Misaad si Ebanghelista Eddie Villanueva, ang first nominee sa party-list nga Citizens Battle Against Corruption (CIBAC) nga, kon mapili, magpabilin siya’ng supak sa bisan unsang balaodnon nga pabor sa demonyo sama pananglit sa SOGIESC ug divorce bill.  Nagkadaiya ang mga plataporma karon sa mga kandidato apan ang labing mahinungdanon nga kawsa nga gihandum sa katawhan mao unta ang tinud-anay nga pagbatok ug pagpakgang sa kurapsyon.  Matud pa bitaw sa akong amigo, “Bahala’g managhan ang bayot/tomboy ug ang mga diborsyado kay dili man sila makadaot sa kalamboan, kaysa mokuyanap pag-ayo ang kurapsyon nga maoy hinungdan sa kaalaotan sa nasud.”  May’lain pa!

Botante ang mo-disqualify

Namahayag ang COMELEC nga wala ma-disqualify nga kandidato sa umaabot nga 2025 elections gumikan lamang sa ilang kapobrehon.  Subay ang maong pamahayag sa desisyon sa Korte Suprema nga ang pagsuta kon aduna ba’y pondo ang kandidato sa pagpangampanya sama ra nga nagdugang ang COMELEC og kwalipikasyon sobra sa gilatid sa konstitusyon.  Apan matud pa sa akong amigo, “Aay daah, dili na sila kinahanglan i-disqualify sa COMELEC, kay ang mga botante na man mismo maoy mo-disqualify kay dili man gyud ang tawo mopili sa kandidato nga walay kwarta. Kay karon’g panahona, bisan kon magpapildi, dako gihapo’g gasto.”  Fezteleern! 

Sugot na la’g bangkito

Gikataho nga mi-file sa iyang Certificate of Candidacy alang sa pagka-mayor sa Davao City si kanhi presidente Rodrigo Duterte.  Bisan sa pangedaron ni Duterte ug bisan nakuptan na niya ang labing taas nga katungdanan sa nasud, na-engganyo gihapon siya sa pagdagan pagka-mayor.  Tinuod gyud tingale ang ilang giingon nga “kagaw” ang politika ug kadtong matakboyan niini, maluya hinoon kon dili mag-apil-apil.  Mao kana’y giingon nga, “Tungod kay magkatol man, bisan kanhi trono’ng bulawan ang gibatugan, karon mosugot na la’g bangkito basta lang naa’y kalingkoran.”  Madahaan!

“Dugay huwam, imo na”

Giawhag sa Chinese Coast Guard (CCG) ang Pilipinas nga mohunong na sa pagsulod ug pag-agi sa Scarborough Shoal dungan ang pag-insister nga nasulod ang maong luna sa hurisdiksyon sa China.  Huygo-todo na ang pagpangangkon sa China sa mga luna diha sa West Philippine Sea. Kon walay konkretong tubag ang Pilipinas sa agresyon sa China, hayan hingpit nga maangkon na gyud sa China ang maong mga lugar.  Makapahinumdum sa Intsik nga nagbagulbol kay sigehan og huwam ni Pedyo ang iyang pala (shovel).  Matud pa sa Intsik, “Ikaw Pedyo, sige kana ikaw huwam pala.  Dugay kana huwam, imo na.” Pagkatoytoy!