Buhing testigo

Human ipatawag sa quad committee si kanhi mayor Tomas Osmeña labot sa nagpadayong imbistigasyon batok sa POGO ug sa extra-judicial killings atol sa drug war sa kanhi administrasyong Duterte, miboluntaryo si suspended mayor Michael Rama nga motistigo sa umaabot nga mga hearing.

Matud ni Rama andam siyang moatubang sa mga sakop sa Kongreso aron pagtug-an unsay iyang nahibaw-an.

Kun nahinumdom pa mo, apil si Rama sa "narcolist" ni kanhi presidente Rodrigo Duterte.

Gani makadaghang higayon siyang ginganlan ni Duterte atubangan sa publiko nga usa sa mga protektor sa illegal nga drugas.

Ang pasangil kusganong gihimakak ni Rama ug namatud-an ning way epekto sa iyang karera sa politika.

Gani bisan sa pasangil napili pa siyang mayor sa miaging eleksiyon. Ug tingali hingpit na niyang nalimpiyohan iyang pangan dihang mismong ang namasangil niya nakig-uban na niya sa pagkakaron.

Ug tungod kay higala naman silang Duterte, posibling ang unod sa iyang testimoniya, kun tugotan sa quad com ang iyang tanyag nga motistigo, mao ang pagdepensa sa kanhi administrasyon sa pasangil batok sa EJK.

Ang iyang kaugalingon maoy lig-ong ebidensiya ni Rama nga di tinuod ang EJK sanglit buhi pa siya hangtod ron bisan kun gipasanginlan niadto ni Duterte nga drug protector.

Sigun hinuon sa ubang mga tigpaniid, swerte si Rama nga nakasikit ni Senador Bong Go nga maoy nakaprotehir niya.

Pero mas interesado ko unsay posibling ibulgar pa ni Osmeña sa sunod hearing.

Kay atol sa iyang paglugwa niadtong Huwebes labihan ka sipa sa iyang paukyab.

Iyang gipasanginlan ang kanhi niya hepe sa kapolisan nga si Royina Garma nga nagdawatan og P1 million matag-semana gikan sa POGO niadtong siya pay hepe sa CIDG-7.

Gilambigit sab niya si kanhi presidential assistant for the Visayas Michael Dino sa operasyon sa POGO.

Duna siyay mga dokumento gisubmitir sa quad committee ug ambot igo ba kaha ni momatuod sa iyang mga pasangil.

Di hinuon credible si Osmeña nga mamasangil tungod kay klarong duna siyay kalagot nilang Garma ug Dino.

Ang duha dako kaayo og papel sa iyang kaparotan sa politika.

Ug alang nako di makiangayon nga ang himoong basihanan sa posibling kalambigitan ni Dino sa POGO tungod lang kay giingong nakapatukod ni og dakong edipisyo.

Samtang di malilong nga nakapahimus si Dino sa iyang koneksiyon sa miaging administrasyon, apan  angayang hinumduman nga negosyante na siyang daan ug ang iyang pamilya sa wala pa matudlong presidential assistant.