Napandol si sir hinungdan nga napaakan niya ang mga tinun-an?

Ang mga magtutudlo nga nagtinarong angayan nga saludohan ug hatagan sa walay kataposan nga pasalamat tungod kay sila ang nakatabang sa mga ginikanan sa pag-umol sa katakos ug kinaadman sa mga bata hangtud na sa pagkadagko ug hingpit nga nahimong professional, dili lang karong buwan sa Septembre hangtud sa Oktobre 5 nga giilang panahon sa mga magtutudlo.

Apan sama sa ubang mga grupo o institusyon, aduna man gyuy molikoy nga mohimo sa pagbinuang ngadto sa ubang tawo. Sama nalang niining usa ka lalaking magtutudlo sa usa ka sekondarya nga tunghaan sa Barangay Basak Pardo sa dakbayan sa Sugbo nga gitumbok sa duha ka mga tinun-an nga namaak nila. Matud pa nga gimandoan sa lalaki o LGBT nga magtutudlo ang mga menor de edad nga tinun-an nga maghubo og t shirt kay motan-aw siya sa mga abs niini. Ang usa nisanong sa kahadlok nga silotan ug wala kaagwanta ang magtutudlo iyang gipaak ang likod kay nanggigil sa Tagalog pa. Gisimhotsimhot pa niini ang likod sa bata, mora’g iro diay nga nanguwag si sir niadtong higayona.

Samtang ang 14-anyos nga lalaking tinun-an gihangyo usab kunong halokan ni sir apan wala kini mosugot hinungdan nga iya gihapon nga gipaaak ang bukton ug gikawatan og halok nga gibinlan pa og laway matud sa bata. Parehong nanghilak ang mga batang tinun-an nga nalisang sa gihimo sa iyang sir nitug-an sa ilang mga ginikanan sa nahitabo kanila. Busa dihang nasayran sa amahan sa usa ka estudyante nga usa ka police officer gipa medical exam niya sa Cebu City Medical Center ug gipa blotter ngadto sa Police Station 7 isip rekisito sa pagduso og kaso batok sa gireklamong maestro sa Don Vicente Rama Memorial National High School.

Gawas sakit sa pinaakan, mas lawom ug sakit ang gibati sa duha ka mga tinun-an nga nidulot sa ilang kasingkasing ug alimpatakan ang gihimong pagpangabuso niini. Kong tinuod man hilabihan gyud ka tampalasan kining maestroha nga gamiton ang iyang gahum aron pahimuslan ang kahuwang sa bata nga iyang hulgaon nga hagbongon.

Pila na kaha ka mga estudyante ang iyang nabiktima? Gawa sa paak basin baya og aduna pay mas grabe ang iyang nabuhat ilabi na nga grabe man kaayo siya ka agressive nga walay respeto sa mga kaubang magtutudlo. Wala na usab siya mahadlok nga makuhaan og video sa iyang gihimo sulod sa tunghaan dihang gikomprontasi niya ang mga tinun-an nga nagpakabana sa nahitabo. Makapangutana kita unsa man normal pa ang utok aning maestroha o maestraha nga magbinastos sulod mismo sa sulod sa classroom.

Moingon lang matud pa kini nga motan-aw sa kinatawo sa estudyante ipapiyong lang ang ubang tinun-an ug kong mobalibad ang tinun-an kusion ang kilid. Bisan seguro og komedya dili kini madawat kining gihimo niya.

Samtang wala man magpa-interview ang magtutudlo alang sa iyang side apan matud niini ngadto sa ginikanan nga napandol kuno siya maong naapakan ang mga tinun-an, pastila sir kaduha gyud ka napandol kay duha man pud ang imong napaakan nga tinon-an.

Nakakita ka og katapat kay police official ang amahan sa bata nga imong gipaak ug dili gyud kini mosibog sa kaso kay disiplinahon kuno ka niya aron dili na ka makaabusar pa sa ubang mga tinun-an. In fairness sa mga opisyal sa maong tunghaan, nihimo na dayon sila og aksyon sa reklamo ug giduso na nila sa ilang dibisyon sa dakbayan. Samtang gipaneguro usab sa DepEd Regional office nga dili nila palabyon ang nahitabo. Hinuon ipatigbabaw nila ang due process hangtud mapatud-an nga sad-an si sir ayha pa sila makapanaug og silot batok niini.