EDITORYAL - Pantalya ra diay

Nangangkon ang kapolisan nga lisud para nila ang pagkahibawo sa kun unsa gyud nga klase ang negosyong gipadagan sa mga establisamento ubos sa ilang mga hurisdiksyon.

Mahimong balido ang rason sa kapolisan mao nga uwahi na sila nakahibalo sa dihang adunay nasakpang sekretong operasyon sa Philippine Overseas Gaming Operator diha sa Tourist Garden Hotel Resort sa Barangay Agus, Lapu-Lapu City.

Matud ni Mayor Junard Chan normal ra ug legal ang aplikasyon sa mga business permits nga gikuha para sa mga establisamento diha sa sulod sama sa restaurant, KTV bar ug grocery. Gani giingong aduna pay klinika sa sud. Apan pantalya ra diay tong tanan.

Kaning maong mga pasilidad diha sa sulod paigo kaayo para sa panginahanglan sa mga ilegal nga langyaw nga sekreto diay’ng nagtrabaho aning mga Chinese POGO companies sa sud aron di sila magsige og gawas-gawas sa compound.

Pamaagi kini aron masiguro nga dili masakpan ang ilang presensiya diha sa Lapu-Lapu City kay dili man sila dokumentadong mga trabahanteng langyaw.

Anhi dapit tingali nagkuwang, dili lang unta kutob pagtan-aw sa papel o aplikasyon pagkuha sa business permit ang buhaton, pisikal gyud kining bisitahon matag karon ug unya ini og hatag na sa ilang mga papeles.

Ikmat sab unta ang mga ahensiya nga kining mga POGO operators dili mopakita sa ilang operasyon sa sud kun duna may maginspeksyon.

Syaro naman lang pud bisan ang barangay wala makahimo og inspeksyon sa sud sa maong resort nganong pirme kining sirado ug kun nganong walay Filipinong maka check-in kay pulos ra langyaw base sa nabantayan sa mga tawo duol sa lugar.

Gawas pa niana, baniog na ang total ban sa POGO subay sa mando ni Presidente Ferdinand Marcos Jr.,  apan wala gyuy nahibulong sa mga lokal nga otoridad nganong pulos langyaw nga Asyano ang mga guests aning maong resort unya walay gawas-gawas?

Tingali kinahanglang usbon sa mga lokal nga kagamhanan ug lokal nga kapolisan ang ilang naandang pamaagi pagpaniid.

Dili lang unta kutob pag-isyu og permits kondili pisikal gyud nga pag-inspeksyon ug palig-unon ang intelligence gathering aron pagsuta kun dunay ilegal nga kalihokan sa mga balay patigayon.