Napakyas nga maniobra
Kon nilampos pa ang maniobra ni Bise Presidente Sara Duterte Carpio, magpabilin untang sekreto giunsa pagpataka og gasto ang iyang confidential funds sa 2022. Kay nisuway diay sa pagtago sa mga detalye sa iyang paghurot sa P125 milyones sulod lang sa 11 ka adlaw.
Ubos sa balaod, ang hatagan sa audit reports sa COA sa confidential funds mao rang Presidente, Senate President ug House Speaker. Nga sa kasarangang mga higayon walay panahon ni interes pagbasa. Kay ang presidente maoy kinadak-an, ug Senado ug House maoy nagtakda, og confidential funds.
* * *
Pero dili kasarangan ang panahon. Dili na alyado ang bise presidente sa Malakanyang. Dili na ganahan ang administrasyon nga modupa sa gikuwestiyon nang daan nga confidential funds ni Carpio.
Nagsugod na sang pagtuki sa budget sa 2025. Maong nahibaw-an sa mga kongresista gikan sa COA nga nahuman nang special audit sa confidential funds ni Carpio. May gahom ang House Appropriations Committee sa pag-subpoena sa report sa COA. Maong nakakita og kahigayonan ang mga kongresista sa pagpanimawos sa hapit inadlaw nga mga panaway og panginsulto ni Carpio batok nila.
* * *
Si Kongresista Gerville Luistro ang nakadiskubre nga nisuway si Carpio sa pagbabag sa COA sa pagsumiter sa audit report ngadto sa komitiba. Gibisto ni Luistro nga ang Chief of Staff sa Office of the Vice President (OVP) nga si Atty. Zuleika Lopez nisuwat sa COA sa dili pagtuman sa subpoena.
Wala magpahudlat ang COA. Mao nga sa pag-atubang ni Carpio nila sa niaging semana, nakahibawo nang tanang sakop sa komitiba nga gipabalik sa COA ang P73 milyones, o P6 sa kada P10 sa iyang confidential funds, kay wala matarung og gasto.
* * *
Mao diay’ng si Carpio nibalibad pagtubag, ug hastang iyang magtatambag nga si kanhi Presidente Gloria Macapagal-Arroyo nisuway pero napakyas pagbabag, sa tanang pangutana sa confidentail funds.
Karon nahibawo nang mga magbubuhis unsa kadunot ang liderato sa OVP. Kadudahan nang daan ang legalidad sa confidential funds, gi-usik-usikan pa gyod ang kinadak-ang bahin sa pundo. Ug dihang gipangayoan og kuwentada, nisuway paglusot pinaagi sa pagpahinumdom sa mga kongresista nga mas popular siya kay nila. Hinaut nga may makahunghong ni Carpio nga siya ray nalingaw sa salida.
* * *
- Latest
