Monkeypox

Matud sa Department of Health (DOH)-7 wa pay kumpirmadong kaso sa monkeypox dinhi sa Central Visayas.

Apan wa ni nagpasabot nga way mga gidudahang kaso nga naa karon sa mga tambalanan.

Gani dihay report nga akong nadawat gikan sa kasaligang tinubdan  nga dunay tulo ka mga gidudahang kaso sa Mpox sa usa ka pribadong tambalanan dinhi sa dakbayan.

Ang tinubdan sa The Freeman gikan sa maong tambalanan mikumpirmar nga dunay mga pasyente nga ilang gipaubos sa test apan wala pay resulta.

Ang mga opisyal sa DOH-7 mapanagan-on paghatag og kasayuran mahitungod niining mga gidudahang kaso sa Mpox diha sa tambalanan.

Ang kanunay nilang gipasalig mao nga wa tay kumpirmadong kaso dinhi sa rehiyon.

Samtang way sayop sa ilang gitug-an apan angayang mas transparent ang DOH sa mga butang nga naglambigit sa public health.

Ug angayang dunay opisyal nga itudlo ang DOH isip ilang tigpamaba nga motubag sa mga pangutana sa media sa tanang higayon.

Ang nahitabo man gud mao nga sa dihang gisusi sa The Freeman ang report sa giingong suspected cases sa Mpox sa usa ka pribadong tambalanan way opisyal nga mohatag og kasayuran.

Ang among reporter igo lang giingnan nga mopatawag ra sila og presscon karong adlawa, Huwebes, aron paghatag og katin-awan.

Sa mga isyu nga may kalambigitan ang public health mahinungdan nga sa tanang higayon dunay opisyal nga makatubag sa mga pangutana sa media aron matubag dayon ang kahingawa sa publiko ug malikayan ang speculation nga posibling makamugna og dili maayong epekto.

Mahinungdan sa usa ka ahensiya sa gobyerno ang communicators nga makapasabot sa isyu.

Dili kinahanglan nga langayon ang pagtubag sa mga butang nga maglambigit sa public health.