Bug-at ra nga silot ni Jonas

Gipahamtangan og usa ka tuig nga pagkasuspenso si Mandaue City Mayor Jonas Cortes sa Ombudsman isip silot sa pagtudlo niya og temporaryong labaw o officer in charge sa City Social Welfare Service Office. Ingon nalang ba gyud niini ka dako ang kalapasan sa mayor ugaling sala man ang iyang gihimo nga hilabihan man ka taas ang silot nga gipahamtang kaniya.  Hinuon kong mao man kini ang gimbut-an sa balaod aw wala nay mahimo kay nakalapas man kaha. Apan angayan nga kumbatehon kini sa kampo ni Mayor Cortes bisan asa man sila mag-abot aron mapanalipdan ang iyang katungod kay dili kalikayan ang mga pagduda nga adunay laing katarongan nga nagpaluyo sa iyang pagkasuspenso.

In fairness ni Cortes, daghan siya ug nahimo nga kalamboan sa Mandaue City dili lang kutob sa plano kon dili nahatagan gyud og katumanan ug makita sa mga mata sa katawhan ang iyang labok ug usa niini ang programa sa pabalay nga nahatagan og desenting pinuy-anan ang mga kabus nga Mandauehanon. Nahatagan sila og mga unit sa condominium project ubos sa Cortes administration. Dili man seguro perpekto nga pagkamayor si Jonas apan makita man pud ang iyang dedikasyon sa serbisyo nga ang iyang gipamulong nahatagan man og katumanan, dili pareho sa uban nga mga lider sa mga LGU nga pulos lang pagarpar ug hangtud karon wala pa gyuy nahimo pastilan. Laing Legasiya ni Mayor Jonas ang Mandaue Green Learning Park sa Barangay Umapad, kinsay magdahum nga ang usa ka dapit nga baho ug hugaw kaayo nahimong matahom nga talan-awon karon. Kining dapita ang kanhi labayanan og basura sa ilang dakyanan apan human napasirad-an, gipaningkamotan nila nga mausab ang imahen niini ngadto sa usa ka simbolo sa pagproteher sa kalikopan.

Pipila lang kini sa mga legacy projects ni Cortes nga motatak kaniya panahon sa iyang pagdumala sa Mandaue City ug dili mahimong papason sa panumduman sa ilang mga molopyo magkinaunsa man,  Sa tinuod lang maapektohan ang planong politika ni Cortes ugaling magpapili siya og balik pagkamayor sa sunod tuig kay gipiangan man gyud siya niining silot nga gipahamtang kaniya. Hinuon kaalyado man niya ang mohulip sa iyang katungdanan, maayo unta kong magpabilin kini sa iyang kampo ug dili mausab sa pagdagan sa panahon kay ang usa ka tuig nga pagkawala ni Cortes sa City Hall daghan pa kaayo ang mahitabo nga kausaban sa kamada sa politika.