EDITORAL - Mga trak nga way tabon

Dili mapitol kining mga drayber ug pahinante ingon man operators aning mga trak de karga aning pagpasagad nila sa ilang mga kargamento nga mangatagak, manglupad diha sa kadalanan kun dili sila pangdakpon.

Makadaghan ng dunay maaksidente tungod aning mga nangatagak nga karga sa mga dagkong trak diha sa karsada.

Usa niini kanang mga construction materials sama sa mga balas, bato, graba yuta ug usahay mga bug-at nga materyales sama sa semento ug uban pa. Sagad niining maong mga trak gipanagiya og mga pribadong kompanya.

Dili sab magpaiwit ang mga trak sa gobiyerno ilabi na sa mga local government units ug sa mga barangay. Kanang ilang mga trak sa basura, gawas nga nanimaho ang karga duna pa gyud mangatagak nga sinakong basura diha sa karsada.

Sa laktod, hugaw ug peligroso kaayo sa mga nagsunod nga mga motorista ilabi na panahon sa kagabhion. Dunay mga aksidente sa dalan nga ang hinungdan kini.

Tinuod nga kasagaran wala gyud masayod ang mga drayber ug pahinante  nga nangatagak na diay ang ilang karga.

Apan dili kini tukmang rason aron dili sila pakasad-on kun dunay maaksidente nga nagsunod kanila diha sa karsada.

Nasayod baya na sila nga kalapasan sa balaod kun dili nila tarungon og ‘secure’ ang ilang mga karga, bisan unsa pa kini, kinahanglan gyud nilang tabunan nga dili matagak o manglupad ini og biyahe.

Apan tungod ba kaha kay ‘kabisado’ na nila ilang trabaho, usahay kining mga gagmay nga kinahanglan untang buhaton ilaha nang makalimtan sa paghimo.

Mao nga husto gyud kining gibuhat sa mga traffic enforcement units nga parahon ug pangdakpon ang mga trak nga dili tarungon og plastar ang ilang mga karga, kay kini mga traffic hazards nga pwede kaayong makadisgrasya sa uban.