Suwat ni Sara
Labing unang timaan nga si Presidente Ferdinand Marcos Jr. nakigbuwag na ni Bise Presidente Sara Duterte Carpio, sukwahi sa ilang luod nga sinaaray nga magpabiling BFF (best friends forever), mao ang pagpagawas sa Malakanyang sa niaging tuig sa suwat ni Carpio ngadto sa presidente pila ka adlaw human sila niasumir sa puwesto.
Ang suwat nagbisto unsay labing importante ug dinalian para sa bise presidente. Ang suwat nahimong pabilo sa pagpapas sa tanang confidential funds sa Office of the Vice President (OVP) ug sa Department of Education (DepEd) sa 2024.
* * *
Ang suwat sa bise presidente nga pinetsahan og Agosto 22, 2022 nangayo og P403.46 milyones para sa nahibiling upat ka buwan sa 2022, apil na ang P250 milyones nga confidential funds.
Nahibaw-an na sa kadaghanan nga P125 milyones ray confidential funds sa OVP nga giaprobahan sa Department of Budget and Management (DBM) ug nga gihurot ni Carpio paggasto sud lang sa 11 ka adlaw. Ang ubang bahin sa suwat makapasabot sa bag-ong mga pakauwaw sa bise presidente.
* * *
Sa samang suwat, nangayo si Carpio og P8.74 milyones para sa special duty allowance sa iyang security personnel. Ang dugang pundo iyang gipasabot nga para sa 450 niya ka security personnel. Pero gisalikway sa DBM ang iyang gipangayo. Sa ato pa:
Kining iyang kasuko nga gikuhaan og 75 ka polis ang kapin sa 300 niya ka guwardiya nanukad sa iyang giisip nga labing importante ug dinaliang panginahanglan sa iyang upisina–ang dugang mga guwardiya; ug
Kumbinsido nang daan ang Malakanyang nga naghinobrang iyang seguridad sa wa pa suyopa sa Presidential Security Command (PSC) ang gipabuwag unta niyang Vice Presidential Security and Protection Group (VPSPG).
* * *
Laing pangayo ni Carpio: Dugang 192 ka co-terminus ug kontraktuwal nga mga kawani sa OVP nga suweldohan og P107.46 milyones. Gibalibaran sab sa DBM.
Gipaundayonan ni Carpio ang ilang naandan sa Davao City: Pag-hire sa kapin sa 11,000 ka kawani ug 110 ka consultants sa City Hall nga way klarong trabaho. Ang pagbalibad sa Malakanyang nidason sa pagduda sa Commission on Audit (COA) nga ghost employees ang gigastohan sa Davao og dul-an usa ka bilyon ka pesos kada tuig.
* * *
- Latest
