Ngiob ug delikado

Hapit kada-semana mopauli mi sa akong asawa sa probinsiya aron mohanggap og lab-as nga hangin ug mopahuway gikan sa trabaho sa tibuok semana.

Naandan namo nga adlawan mogikan, apan tungod sa kalangay sa byahe gumikan sa traffic nakahukom mi niadtong Biyernes nga gabii mogikan aron makalikay sa kahuot sa trapiko nga gipasamot sa way kinutoban nga proyekto sa DPWH pag-ayo sa mga karsada paingon sa habagatang Sugbo.

Pasado alas 9 na sa gabii mi nigikan ug tinuod wa na mimatanggong sa traffic.

Apan mas peligro ang byahe labi pa niadtong mga di suhito sa karsada tungod sa daghang mga wala pa mahuman nga proyekto sa DPWH ug way klaro nga mga warning device.

Gawas nga way klarong  mga signage nga gibutang ang DPWH ug kontractor niini, labihan sab kangiob sa national highway paingon sa habagatan.

Ambot unsay nahitabo sa budget sa DPWH aron pagmintinar ug pagpasuga sa kadalanan?

Nganong labihan kangitngit sa national highway?  Maghuwat ba ang DPWH nga dunay mga aksidente nga mahitabo usa molihok?

Kun imong itandi ang national highway sa mga provincial ug bisan na sa mga barangay roads sa probinsiya, angayang manlipaghong sa kauwaw ang mga opisyal sa DPWH.

Labihan ka hayag sa mga provincial ug barangay roads tungod sa mga solar lamps nga gitaod sa kagamhanan sa probinsiya.

Apan ang national highway labihan ka ngitngit ug ka delikado sa mga motorista.

Maayo tingali nga sunggalon sa mga mayor sa kalungsoran ang DPWH nga sigurohon nga kabutangan og suga ang kabahin sa national highway  nga anaa mahimutang ubos sa ilang mga hurisdiksiyon.

O tingali mas dali kun ipatawag ni Gobernador Gwen Garcia ang mga opisyal sa DPWH aron pahinumduman nga lakip sa ilang responsibilidad ang pagpasuga sa mga national highway.