EDITORYAL - Pagkaluoy sa mga mamumuo

Makahibulong kun nganong sa pagka-kugihan ug pagka-agwantador sa mga Pilipinong mamumuo dinhi sa nasud, nganong pobre man gihapon ug nagkalisod ang mga tawo bisan kadtong dunay mga regular nga trabaho?

Gani sumala pa sa report sa Remote's Global Life-Work Balance Index, sa 60 ka mga nasud nga ilang gianalisar ang “work-life balance” ang Pilipinas naa sa ikaduha gikan sa kinatumyan o ika-59. Ang sukdanan niini anha gikuha sa mga kapitolyo o kapital sa kada nasud.

Matud pa sa maong report, ang ManilaPilipinas naka-iskor lang og 27.46 sa 100 sa work-life balance, maguwang lang og gamay sa Abuja sa Nigeria nga naa ray 16.15. Arang-arang nalang tingali ang Pilipinas kay kun buot hunahunaon, mas adunahan ang Nigeria tungod sa ilang abundang oil deposits ug natural reserba gikan sa kinaiyahan.

Gani nalupigan pa ang Pilipinas sa nasud sa Ethiopia nga naa sa 58th ug Baghdad (Iraq) nga ika-57th. Apan dili angay ikaguol, kay bisan gani ang Amerika nasud sa top 10 worst kay kini naa sa ika-55th rank.

Gibase kini resulta sa report sa kun unsay kasagarang gitas-on sa oras sa tingtrabaho kada semana, minimum wages, tinuig nga ‘paid leave’ ug mga polisiya sa mga kompanya bahin niini, sick pay, maternity leaves, healthcare ug uban pang makaapektar sa kinabuhi sa trabahante nga gibalanse sab sa gross domestic product (GDP) niini.

Ang tumong sa maong tinuig nga pagtuon mao ang pagpakita kun giunsa pagtratar sa mga negosyante sa kada nasud ang ilang mga empleyado, kun gitan-aw ba nila og una ang kaayohan sa kinabuhi nila ayha pa ang trabaho.

Unsa man gyud unta maoy makiangayon? Dili ba dapat man gyud tan-awon ug siguraduhon una sa mga kompanya ang kahimtang sa kinabuhi sa ilang mga empleyado ug dili ang trabaho ug uwahi na ang ilang pamilya?

Dili tapulan ang kasagarang empleyadong Pilipino, gani sobra-sobra pa ang uban mohatag sa ilang oras para sa ilang trabaho kun itandi sa oras para sa ilang pamilya kada adlaw.

Kini bisan pa og gamay kaayo ang ilang sweldo matag adlaw. Ang mga negosyante hakog mohatag og makiangayon nga suholan ug nagsalig sa mga regulasyon nga klaro man kaayong sa ila pirme pabor.