Nakuryentehan ang COOP

Gipahamtangan sa Energy Regulatory Commision (ERC) og P2 milyones nga multa ang Isabela Electric Cooperative (ISELCO) tungod sa kapakyas niini pag-justify sa tag-as nga charges nga ilang gitingil sa ilang konsumidor.   Seryoso nga pagpabaya sa ilang katungdanan ubos sa Epira Law ang gibuhat sa ISELCO.  Kon ipaubos sa ERC ang tanang power distribution utilities sa makuting pakisusi kabahin sa ilang gipangtingil nga mga charges, hayan daghan pa’ng distribution utilities ang mapahamtangan sa silot.  Ni’ng pagpamulta sa ERC sa ISELCO, maingon nato nga “nakuryentehan” na gyud ang maong electric cooperative.  Muleeng!

“PALEHO LA”

Mopasaka ang Office of the Solicitor General (OSG) og petisyon alang sa pag-kanselar sa birth certificate ni Mayor Alice Guo human makompirmar sa NBI nga parehas ra ang iyang fingerprint sa usa ka Guo Hua Ping nga usa ka Chinese passport holder.   Isip usa ka langyaw, dili unta si Alice Guo makapasilong sa landong sa atong mga balaod.  Apan daw nagmakuli ug hinay kaayo ang atong kagamhanan sa pagpahamtang sa tukmang silot batok kaniya.   Ang pagtratar sa atong kagamhanan sa kaso ni Alice Guo nahisama ra usab sa atong reaksyon sa gibuhat sa China didto sa West Philippine Sea.  Matud pa sa akong silingan nga Intsik, “Paleho la”.  Fezteleern!

HIMOON UNA’NG BUANG

Gihulagway ni Daniel Zagury, usa ka psychiatrist, nga usa ka praning (paranoid) si Russian leader Vladimir Putin.  Dugang pa ni Zagury nga wala na’y reyalidad sa pagkatawo ug kinabuhi ni Putin ug aron magpabilin siya sa gahum, wala na siya’y pagsalig sa bisan unsang butang ug kang bisan kinsa’ng tawo.  Kinaiya gayod sa mga diktador ang pagka-praning.  Makapahinumdum kining gibutyag ni Zagury sa panultihon nga “Kinsa kadtong buot gun-obon sa mga diyos, ila una’ng himoon’g buang”.  Madahaan!

ADUNAY ANDAM NGA RASON

Mipasalig si Agriculture Secretary Francisco Tiu Laurel, Jr., nga aduna na’y ibaligya nga bugas sa Visayas ug Mindanao nga tag-P29 ang matag kilo karong bulan sa Agosto pinaagi sa mga Kadiwa Centers.  Mahinumduman nga yano ra nga gisaad ni Presidente Marcos nga tag-P20 na lang unya ang kilo sa bugas apan wala niya kini matuman.    Ni’ng higayona, daw gisubli na sad ang maong saad apan paaboton pa nato ang bulan sa Agosto una kini ipatuman.  Haum gayod ang panultihon nga, “Ang politiko maayo mosaad og mga maanindot nga panghitabo sa umaabot ug andam kanunay sa iyang rason ngano nga wala mahitabo ang iyang gisaad” May’pag moligeed!

MAGLISOD SA PAGBASA

Gimandoan ni Presidente Marcos ang bag-ong kalihim sa DepEd nga si Juan Edgardo Angara nga kinahanglan ibalik pagtudlo ang subject nga “history” ug nga seguradohon nga ang mga tinun-an makat-on sa pagbasa ug pagsabot sa ilang gibasa.  Tinuod nga morag napasagdan na ang batakan nga mga leksyon kay daghan gayod ang mga tinun-an karon nga maglisod pagbasa.  Makapahinumdum sa bata nga gisugo pagpabasa apan ang larawan lang sa produkto ang iyang gibasehan, busa inay “Bioderm” ang iyang litokon, miingon na hinoon ang bata nga “Broncho Rub”.  Pagkatoytoy!