EDITORYAL - Palarong Pambansa

Naghinam-hinam na ang tanan Palarong Pambansa 2024 nga dinhi sa Cebu City pagahimuon. Gibanabanang moabot sa 25 mil ka mga atleta, delegado ug ilang mga kabanay ang modagsa sa siyudad alang sa maong torneyo sa paugnat sa kusog.

Milyones ka pesos ang gibubo sa siyudad para niini. Gipanindot ang mga pasilidad ilabi na diha sa Cebu City Sports Complex nga maoy labing dako nga sporting facility tibuok lalawigan sa Sugbu.

Dili lang mga atleta ang manganhi, kondili duna say mga pipila ka mga lokal nga opisyales diin gikan ang mga atleta, staff sa nagkadaiyang schools divisions, coaches ug mga kabanay nga supporters sa mga atleta.

Mao nga oportunidad kini para sa tanan ilabi na sa mga negosyante, gagmay man o dagko. Gani, ang Cebu City ug ang Provincial government nagtinguha nga magtinabangay alang sa kalamposan niini nga kalihokan.

Gusto sa duha ka LGUs nga mamahimong sports tourism ang maong okasyon. Mahimo nilang i-promote og maayo ang tanang mga nindot nga mga tourist spots dinhi sa tibuok isla sa Sugbu.

Maayo nga siguraduhon kaning mga billeting areas ug mga venues sa duwa kompleto gyud sa mga gikinahanglang pasilidad, dili lang sa katulganan dapat naa gyuy walay hunong nga tinubdan sa tubig, dunay pagkaon, dunay paigong gidaghanon sa kasilyas ug ilang seguridad.

Karon nga nagsige na ang pagbunok sa uwan ug kinahanglang siguraduhon sab sa siyudad sa Sugbu nga dili madelatar ang mga atleta sa ilang pag-adto sa mga sporting venues tungod sa traffic, tungod sa kakuwang sa transportasyon ug labaw sa tanan kaning pagbaha sa mga kadalanan.

Nasayud naman tanan nga dunay mga dalan sa Cebu City nga pwerteng taasa sa tubig baha kun mobunok ang kusog nga uwan nga makaparalisar sa trapiko.

Sa kataposan, ang kalamposan sa maong kalihokan naa tanan sa katawhang Sugbuanon isip mga tagbalay ug ang mga atleta ang mga bisita.