Sa di pa molikoy
Sa di pa mahinayak si Presidente Ferdinand Marocs Jr. sa paglikoy lagda sa iyang administrasyon sa West Philippine Sea (WPS), angay siyang pahinumdoman sa labing importanteng leksiyon sa kasaysayan sa atong pagsupak sa pag-ilog sa China sa kabahin sa atong nasudnong teritoryo:
Kada sibog sa Pilipinas sa WPS, aron pagpakalma sa sitwasyon ug aron pagpaubos sa tensiyon, ang China wa nisibog, labaw nang wa nikalma, hinunoa nahimo nga mas agresibo sa pagsakmit sa dugang mga teritoryo, nga klarong nahimutang sud sa 200 nautical miles nato nga exclusive economic zone (EEZ).
* * *
Nitumaw ang pait nga pagtulon-an di lang kausa, di lang kaduha, kon dili katulo na ka higayon. Kon sundon ni Marcos ang nag-unang tulo, siya ang mahimong tag-iya sa ikaupat ug posible nga labing grabe ug di na mabakwi nga sayop:
• Unang sayop iya ni anhing Presidente Fidel Ramos niadtong 1995 dihang iyang gipasibog ang atong warships ug fighter jets gikan sa Mischief Reef kay nituong magtukod rang China og dangpanan sa mga mangingisda ug nadani sa gisaad nga binilyon ka dolyar nga mga proyekto ug puhonan (Resulta: Natukod ang artificial island nga nahimo nang baseng militar sa China);
* * *
• Ikaduhang sayop iya ni anhing Presidente Noynoy Aquino niadtong 2012 dihang iyang gipasibog ang barko sa Pilipinas gikan sa Scarborough Shoal tungod sa saad sa China nga modungan pag-atras ang ilang barko (Resulta: Wa mobiya ang China hangtod karon ug gibabagan nang mga Pilipino sa labing abundang pangisdaan sa Scarborough); ug
• Ikatulong sayop iya ni kanhi Presidente Rodrigo Duterte niadtong 2016 dihang nitila siya sa lapalapa sa China bugti sa pasalig ni Presidente Xi Jinping nga $24 bilyones nga mga proyekto ug puhonan (Resulta: Wa rang kaabot og 5% ang kuwartang gipagawas sa China ug gitam-okan og patayng corals pangandam sa pagtukod og artificial islands sa Sandy Cay sa Pag-asa Island, Rozul Reef sa Recto Bank ug Sabina Shoal duol sa mainland Palawan).
* * *
Unsa may plano ni Marcos? Isurender niyang BRP Sierra Madre ug Ayungin Shoal aron nga di na banggaan sa China ang atong mga barko ug mga sundawo ug mga mangingisda?
Unsa may sunod niyang itahan? Sandy Cay? Rozul? Sabina? Ug Palawan?
* * *
- Latest
