Tax amnesty

Siyaro og dili lang gihapon mamayad sa ilang real property tax ang mga tag-iya og real property units karon nga gipirmahan na ni Presidente Bongbong Marcos ang paghatag og duha ka buwan nga amnesty pagpahamtang og interest ug penalty.

Ang epekto sa pagpatuman niining mao nga balaod, makakolekta og dakong revenue ang kagamhanan kay daghan na man ang mamayad og real property tax sa ilang mga yuta, balay/building ug mga makinarya.

Dunay balaod nga gilatid sa Local Government Code nga kadtong mga property sama sa yuta nga wa na bayri og buhis sa ilang mga tag-iya, mahimong isubasta sa kagamhanan aron mabayran ang obligasyon sa mga tag-iya.

Apan mora’g nakabantay ko nga wa na kaayo kini himoa, bisan pa dinhi sa Cebu City. Ang tax rate sa mga real property units (RPU) dinhi sa Cebu City, ubos pa gani gyud kaayo kay wa man himoi og kausaban sa mga konsehal sukad pa adtong 2007.

Hadlok man nga kadtong moduso og lakang nga pausbawan ang bayranan sa buhis posible nga kasuk-an sa mga magbubuhis ug dili na unya makadaog sa subli nilang paglansar sa politika.

Busa, higayon na kini sa mga tax payers nga wa na makabayad sa ilang mga real property tax nga bayari na kay giwagtang na ang interest ug ang penalty sa inyong bayranan.

* * *

Mora’g nagkaanam na og kaklaro nga magkaatbang na gyud sila si suspended Cebu City Mayor Michael Rama ug si Acting Mayor Raymond Garcia sa umaabot nga election.

Gani sa Independence Day celebration sa Barug Team Rama kaniadtong Miyerkules sa hapon diha sa Plaza Sugbo nga gipasiugdahan ni Mayor Rama ug gitambongan sa mga dumadapig sa Team Rama, wa si Acting Mayor Raymond.

Unya, gipahibawo ni Mayor Rama nga si Acting Vice Mayor Dondon Hontiveros maoy posible niya nga ikatandem pagka vice mayor sa pagpapili niya pagbalik pagka mayor karong sunod tuig.

Ang akong nabalak-an kon magkabuwag sa politika sila si Mike ug Raymond, kay mabahin ang ilang ilang mga botos. Pareho sila og grupo sa paglansar kaniadtong miaging election, ug kon magbuwag sila, magkatibulaag ang mga dumadapig.

Dunay magpabilin ni Mayor Mike, ug duna sa’y mokuyog kang Acting Mayor Raymond. Niining pormaha mora’g makabentaha ang mga kandidato nga wa mabungkag ang mga supporters, sama ni Konsehal Nestor Archival nga kandidato sa BPOK pagka mayor.

Unya, naa pa si Yogi Ruiz nga gitan-aw nga maoy kandidato pagka mayor nga gisuportahan sa Malacanang, ug si Atty. Joey Daluz nga founder sa Partido Panaghiusa.

Para nako, angay’ng sulbaron nila ni Mike ug Raymond ang ilang “misunderstanding” sa pagka karon.