Unsay tinuod?

Angay gyud nga imbestigahon kadtong aksidente nga usa ka construction worker nahulog ug namatay didto sa construction site sa Barangay Maluray, lungsod sa Dalaguete kaniadtong Miyerkules.

Nganong angay man kini nga imbestigahon? Ang igsuon sa namatay miingon nga ang iyang maguwang nga si Jerson Enseñales, usa ka Job Order worker sa Municipality of Dalaguete apan gipatrabaho sa gitukod nga multi-purpose building nga gikontrata og private contractor.

Pangutana, kon tinuod man nga Job Order worker si Jerson sa lungsod sa Dalaguete, dili siya angay’ng motrabaho sa proyekto sa Barangay Maluray nga gikontrata og private contractor.

Ang igsuon ni Jerson nga si Jonalie Enseñales, gi-interview sa DYLA ug miingon nga nakakita gyud siya nga ang pay slip sa iyang maguwang, gikan sa Municipality of Dalaguete.

Hinuon, si Dalaguete Mayor Ronald Allan Sesante abtik kaayo nga nanghimakak nga si Jerson dili kuno Job Order worker sa lungsod. Aw, tan-awon nato unya kon nagtug-an ba siya sa tinuod.

Kining kasoha imbestigahon na sa National Bureau of Investigation (NBI) kay ang pamilya ni Jerson midangop na sa NBI ug nangayo’g tabang.

Awhagon nako ang NBI nga apilon gyud nila pagtan-aw kon tinuod ba nga JO si Jerson sa lungsod sa Dalaguete. Kon tinuod man ang gitug-an sa igsuon ni Jerson, ang pangutana nganong gipatrabaho man siya sa construction nga kuno gikontrata og private contractor?

Mahimo diay na? Ngil-ara no, kon tinuod man nga private contractor ang nagkontrata sa pagtrabaho pagtukod sa multi-purpose building, unya ang mga tawo nga nagtrabaho mga trabahante sa lungsod, ug duna pay mga makinarya sa lungsod nga gigamit?

Kon husto man gani ang pamahayag sa manghod ni Jerson, maisip kini nga graft and corruption, ug angay’ng susihon kini pag-ayo, ilabi na giingong dunay mga engineer nga nagtrabaho sa lungsod nga maoy nag supervise sa construction project.

Angay gyud nga si Mayor Sesante mohatag og tukma nga report kabahin niini, kay sa pag-interview niya sa DYLA, masabot kaayo nga dili siya “straight forward” nga manubag sa mga pangutana.

Naikag ko niining mao nga isyu, dili tungod kay makita nga ang contractor sa project wa makatuman sa gilatid nga Safety measures sa Department of Labor nga ang mga trabahador magsul-ob gyud og construction helmet, steel toe shoes, ug dunay mga higot sa ilang lawas kon ang trabaho naa sa ibabaw.

Ang tumong niini aron nga kon mahitabo nga maaksidente ang mga trabahador, sama sa nahitabo ni Jerson, dili siya mahulog, magbitay ra siya og mahimo pa nga maluwas. Sige lang, unta ang mga kauban nato sa media makahimo og investigative report kabahin niini.