Bagulbol gihapon?

Naghapon na lang nga nagsige’g taligsik kagahapon, human sa kusog kaayong pagbunok sa uwan, nagpabilin ang madag-omon nga panahon.

Nakadungog ko nga dunay mga nagbagulbol kay lisud kuno ang pag-travel, apan ako nga nakadungog, bisan og usa ko sa apektado igo ra nga mipahiyom.

Kaniadto dihang pwerte kainit ang panahon, ug misangpot sa pagkahubas sa mga tinubdan sa tubig, nagyawyaw sab ang mga tawo kay mihinay man ang agas sa ilang mga gripo.

Karon nga nag-uwan na ug mapuno na pagbalik ang atong mga dam ug mobalik na ang kusog nga presyur sa tubig, nagbagulbol lang gihapon.

Kagahapon, usa ko sa nasakripisyo kay nag-process ko sa mga dokumento alang sa usa ka sakop sa akong pamilya nga naospital.

Napugos ko pag-taxi paingon sa City Hall ug aron makakuha og benepisyo sa City Hospitalization and Medicines Program (CHAMP).

Gamay ra ang akong nakuha gikan sa CHAMP, ug nagpasalamat ko ni Acting Cebu City Mayor Raymond Alvin Garcia kay mitanyag siya sa laing medical assistance program.

Kaluoy sa Ginoo, gamay na lang ang akong nabayran sa ospital ug wa na kaayo maglabad ang akong ulo. Salamat kaayo Acting Mayor Raymond!

* * *

Kon motunga karong hapon ang kadagkoan sa Tokagawa Global Corporation atol sa miting namo sa Cebu City Traffic Management Board, makahigayon na gyud ko pagpangutana kon nganong miabuso man sila dinhi sa siyudad.

Ang gipasabot nako nga abuso tungod kay samtang wa pa gani sila tuguti sa tinguha nila nga mangolekta og parking fees niadtong mga tag-iya og sakyanan nga moparking daplin sa karsada sa adlaw’ng Domingo, nangolekta na man sila.

Ikaduha, nganong gipangilisan man nila ang mga signages aron ipakita sa katawhan nga approved na ang pagpangolekta og Domingo, ug nga gilugwayan ang pagpangolekta hangtud sa alas 9 sa gabii?

Lain nakong ipangutana kon nganong namakak man sila sa ilang gisumiter nga lista ngadto sa Cebu City government kabahin sa gidaghanon sa mga parking slots, aron ipakita nga gamay ra ang ilang makolekta?

Sama pananglit sa Don Mariano Cui Street atubangan sa Chong Hua Hospital, ang Tokagawa miingon nga duna lay 95 ka parking slots alang sa mga motor, apan dihang gisusi nako ug giihap kaniadtong Domingo, 127 man ka parking slots?

Sa Sanciangko Street gikan sa eskina Leon Kilat paingon sa atubangan sa Cebu Colesium, duna lang kuno’y 6 ka parking slots sa mga motor, apan nganong dihang giihap nako, miabot man og kapin sa 120?

Sa ubang karsada, mao sab ang sitwasyon. Mao kini nga naghinam-hinam ko nga makapangutana sa tagdumala sa Tokagawa kabahin niini atol sa among miting karong hapon.