EDITORYAL - Oplan Bulabog vs mga badlungon

Dunay klase-klaseng mga anti-criminality campaigns ang Philippine National Police aron pagpakgang sa mga krimen diha sa kadalanan ug diha sa komunidad.

Kaning mga oplan-oplan magdepende sa sa kung unsa ilang gitutokan, apan dunay usa sa ilang mga kampanya nga wala ikahimuot sa uban. Kaning "uban" nga gipasabot mao kadtong mga badlungon diha sa ilang barangay.

Ang badlungon nga giingon dinhi, wala magpasabot nga kadto lang gyung mga kriminal o mga nalambigit sa ilegal nga drugas.

Dunay daghang badlungon nga wala pa makahimo gyud og krimen, apan ang ilang binuhatan ug kinaiya ug gawi sa ilang lugar daghan ang wala makauyon tungod sa ilang pagkasabaan, bugalbugalon, palainom diha sa agianan, magsige og panghasol sa uban, magsugal diha sa agianan ug uban pa.

Kaning uban wala man tinuod “agi” o wala sukad malambigit og krimen o wala sukad mareklamo o mapriso apan wala magpasabot nga walay nagdumot kanila. Apan sila humok kaayong malambigit sa krimen, posibleng sila maoy mabiktima o silay makasala.

Tingali dili lang gusto og samok sa uban maong dili nalang motingog kay basin modako na hinuon. Samot na kun sila hambugeruhon og kinaiya o may gisaligan kay kwartahan o ‘naay kapit’ sa barangay.

Daghan og mga ingon niini nga klase sa mga tawo diha sa mga suok-suok sa mga barangay. Mga tawong walay respeto sa ilang mga silingan, bisan mga barangay tanod dili tahuron ilabi na ang uban kanila ilaha rang mga higala.

Kaning Oplan Bulabog sa Cebu City Police Office epektibo kaayong pangdisiplina aning mga tawhana nga maghawud-hawod diha sa mga suok sa mga barangay.

Maayong panagsahan og duaw sa mga polis kining mga hilit nga dapit aron sab mapitol.

Usa pa, makadugang kini og dakong pagsalig sa publiko ngadto sa ilang kapolisan basta klaro lang sab ang pagpatuman sa balaod ug walay surambaw , kay sa panahon karon, halos tanang mga tawo mahilig ng mokuha og video kun dunay kasikas sa ilang mga lugar.

Dili kinahanglang mabutang sa risgo ang mga polis  pinaagi sa pagsunod lang pud sa mga lagda atol sa paghimo sa ilang trabaho.