Inay portalet, ayohon nalang ang mga pansayan sa mga tunghaan

Multimillion pesos ang gigahin sa dakbayan sa Sugbo alang sa Palarong Pambansa aron maseguro nga pang Singapore-like gyud ang kanindot niini nga makadani sa mga bisita nga langkoban sa mga atleta ug tanan nga mga delegado sa sangka sa paugnat sa kusog sa nasod.

Apan karon pa lang, aduna nay mga mitumaw nga kwestiyon sa budget tungod kay hilabihan man ka dako ug dili usab practical kuno nga usikan og salapi apan inig human sa Palarong Pambansa wala na. Sama nalang sa mga portable toilet kon portalet nga gigahinan gyud og P18 milyones alang sa 478 units nga mga portalets.

Kasilyas lang nga pabuhagayan og hugaw sa tawo mogasto og ingon niini unya magamit sulod lang sa 17 ka adlaw kay giabangan ra man. Gipasabot sa acting besi mayor nga mas practical ug makadaginot kong abangan kay kong paliton kini molabaw pa sa katunga sa 18 milyones pesos ang magasto kay tag P90,000 man ang matag usa ka portalet with shower.

Duna say punto ang bise mayor apan ang pangutanan gikinahanglan ba gyud nga mangabang ang dakbayan og portalet? Asa naman diay ang mga existing portalet sa Cebu City? Gamay ra itandi sa daghang mga tawo nga modagsa sa syudad sa pag abot sa panahon sa Palaro?

Mamahimo ra man mag abang kong magkuwang gyud apan dili seguro ingon niini ka daghan tungod kay aduna pa may mga pamaagi nga dili mausik ang kwarta. Kong kining minilyon ka pesos nga gigahin sa pansayan gamiton kini sa pagpaayo o pag-improve sa mga existing comfort rooms sa mga tunghaan nga himoong billeting area mas maposlan pa inig ka human sa Palaro kay monindot naman ug ang mga tinon-an ang mabulahan.

Ang tanang mga classrooms sa mga eskwelahan adunay pansayan, ug kong dili maigo maghimo sila og addidtional sa palibot sa billeting area nga maposlan og taas nga panahon sa mga tinun-an. Nganong dili man lang kini ang himoon sa dakbayan?

Inay mowaldas og dakong kantidad sa panudlanan sa dakbayan, himoon kining Palarong Pambansa nga kahigayonan aron mas mapalambo ang mga eskwelahan ilabi sa mga public schools nga problema hangtud karon ang pansayan. Imbis mangabang og portalet, ang kwarta alang niini ang gamiton sa pagpahimo og mga pansayan, solbad ang suliran.

Usa lang kini sa gitan-aw karon ni Garcia nga makaayo ug makabintaha ang Cebu City. Ang kwarta gikan sa singot sa mga taxpayers angayan nga ampingan, kong gastohon man seguradohon nga mapahimuslan kini sa katawhan ilabi na sa mga nagpuyo sa dakbayan sa Sugbo.