Bata gipakisama pagdagmal sa banakon

Nakalugmaw gyud akong luha dihang nakita nako ang 7-anyos nga batang lalaki nga biktima sa pagpangdagmal sa 24-anyos nga uyoan niya, not by blood kay bana ra man sa iyang iyaan.

Apan bisan og dili igbaho og paryente wala gyud unta siyay katungod sa pagpasakit sa usa ka anghel.

Nasud-ong nako ang kahimtang sa batang biktima dihang gidala kini sa iyang iyaan sa barangay hall sa Labangon sa dakbayan sa Sugbo alang sa pagduso og kaso batok sa suspek nga natanggong na sa bilanggoan. Naputos sa labod ang iyang likod, dili lang gani bun-og kon dili samad gyud intawon ug posibleng naapektohan ang bukog sa bata kay maglisod naman kini sa paglakaw.

Base sa video, kalima gihapsan sa suspek sa gigamit niining lipak sa kawayan nga walay pugongpugong nga mora’g nagbunal og banakon nga gikinahanglan pa siyang pugngan sa mga babaye nga ilang kauban. Napanglimotan kuno ang suspek sa kalagot kay gidagmalan sa biktima ang anak niini nga dos anyos.

Pastilan ang siyete-anyos wala pa man gyud intawon kiniy buot palaaway ang kinaiya niini kay dili pa lagi makakontrol sa emotion ug nakahimo sa pagdapat sa anak sa suspek.

Mamahimo ra man unta niya kasab-an o  ba kaha pilpilon ang kamot aron makaamgo apan iya naman hinoon gihinaykan.

Nasayran nga ang inahan ug amahan niining bataa parehong napriso tungod sa illegal drugs maong napasa pasa kini sa iyang mga kadugo.

Una didto siya sa side sa iyang amahan sa Consolacion diin siya gipaeskwela apan gikuha siya sa side sa iyang inahan sa Labangon ug wala na ibalik hangtud nga nakaundang siya sa pag eskwela ug dinhi usab siya hapit mamatay sa bunal nga iyang naangkon.

Pait kaayo ang bata nga walay ginikanan nga mag atiman kay kay daug daug gyud ang mahiaguman, sugo diri sugo didto, bun-og diri kulata didto gamayng sipyat lang bugtian og sakit sa lawas.

Maayo nalang kay nibarug ang iyaan niini nga ipadayon ang pagpasaka sa kaso ug gisuportahan kini sa daghang mga tawo nga naluoy sa kahimtang sa bata aron maangkon ang hustisya sa iyang gidangatan.

Walay si bisan kinsa ang adunay katungod nga mopasakit ni bisan kinsa ilabi na sa mga bata nga walay dag-anan.

Ang suspek igo lang nilaban sa iyang anak nga nadapatan sa biktima nga nisangpot sa hapit niya pagpatay sa bata.

Unta iyang gihuna huna ang iyang anak maoy buhatan sa uban unsa man ang iyang bation. Swerte ang iyang mga anak nga anaa sila andam manalipod sa mga anak apan sa 7-anyos nga biktima nahisama na sa ilong tuwapos o orphan nga nagkinahanglan sa paghigugma ug pagmahal sa mga tawo nga anaa sa iyang palibot.

Sa iyang gibuhat, ang mga anak niini ang makaluoy kay mawad-an pud og amahan nga mohatag kanila og proteksiyon.

Kong away sa mga bata dili lang unta mag apil apil ang mga dagko, ang papel nato mao ang pagbadlong ug pagpahigmata nga sayop ang gihimo niini ug dili na usbon pa.