EDITORYAL - Hulga sa vendors ang zoning?

Nabalaka ang mga vendors sa Carbon Public Market tungod sa gitakdang pagpatuman sa the Revised Comprehensive Cebu City Zoning Ordinance of 2025 kun hingpit kining mapirmahan ni outgoing mayor Raymond Garcia.

Nabalaka sila nga basin og tungod sa maong ordinansa mawagtangan sila og katungod sa ilang mga pwesto kay mahimo naman lang silang mga tenants.

Sa ilang pagtan-aw ang kaniadto klasipikasyon sa Carbon Public Market nga institusyonal ngadto na sa pagka komersyal. Kaning intitusyonal, mura ni og naandan na nga saksak sinagol ang mga makita ug mapalit.

Sa kaso sa Carbon, saksak-sinagol ang mga produkto, gikan sa pagkaon hangtud sa mga galamiton sa balay ug uban pa, ang mga mapalit.

Kaning komersiyal nagkahulogan og negosyo ug dunay kitaon. Pero unsa may nakalahi ani sa duha, pareho ra man, negosyo gihapon. Mas maayo tingaling mokuha og abogado kining mga grupo sa mga vendors aron maoy mohagpat sa matag probisyon aning ordinansaha ug ipasabot kanila tagsatagsa kun unsay unod ani ug kun unsay epekto.

Kun maapektahan ba ang kasamtangan nilang sitwasyon o dili. Kay kung buot hunahunaon, kaning Carbon Public Market, makonsiderar naman gyud kining commercial ang klasipikasyon.

Dili lang maayo kun pananglitanan i-privatized ang Carbon Public Market, diin pribadong kompanya na maoy modumala, ug ang mga vendors anha na magbayad og arkabala.

Sa habig sa siyudad, makabuhi na kini sa mga obligasyon sama sa paghipos sa basura, pagmentinar sa kalimpyo ug kahapsay sa palibot niini, apil na ang seguridad kay adto naman kini isangon sa pribadong kompanya.

May punto sab ang kabalaka sa mga vendors, kay kun tinuod ma-commercialized kini, magkinto na sila sa kompanyang modumala sa merkado.  Ang nakaayo ani, dili na sila makapatara-tara lang og ladlad sa ilang mga baligya bisan asa, ilabi na diha sa dalan nga pirme nang maghuot.

Usahon na tanang klase sa baligya sa usa ka lugar  aron sayon nalang tultulon sa mga mamalit, apan kaning sistemaha, samtang mas napahimutang ang tanan, mawala na ang naandang talan-awon sa Carbon Public Market nga diin ang mga produkto bisan asa pwedeng mabaligya.