Dugang palas-onon

Dili maayong balita kay mosaka ang atong bayranan sa kuryente karong buwan sa Mayo ug buwan sa Hunyo.

Matud sa kadagkoan sa Visayan Electric nga pausbawan nila og 86 sentimos ang matag kilowatt-hour nga konsumo nato sa kuryente.

Gikan sa P11.28 sa matag kilowatt-hour nga kuryente, himoon na kini nga P12.14, tungod kay misaka man ang generation cost sa kuryente.

Mihatag ang Visayan Electric og pananglitan nga kon ang usa ka konsumidor adunay konsumo nga 200 kilowatt sa usa ka buwan, madugangan ang iyang bayranan og P172 sa sunod nga bill.

Pero banabana nako, subra pa gani ang madugang sa bayranan kay naa pa may Power Cost Adjustment. Busa, mangandam na lang ta daan.

* * *

Samtang mosaka ang bayranan sa atong kuryente, nia pa ning Tokagawa nga maoy nangolekta sa parking fees niadtong moparking daplin sa karsada dinhi sa siyudad, nga gustong tanang adlaw sila mangolekta.

Pagka karon, ang ordinansa sa siyudad Lunes hangtud sa Sabado ra ang gitugot nga mangolekta og parking fees, unya gikan ra sa alas 7 sa buntag hangtud sa alas 7 sa gabii.

Abi ninyo og unsay tinguha karon sa Tokagawa? May suwat sila nga gipadala sa Cebu City Traffic Management Board nga gusto nilang apilon ang Domingo nga sila mangolekta.

Unya, imbes alas siete ra sa gabii kutob ang pagpangolekta og parking fees, gusto sa Tokagawa nga iabot nila ngadto sa alas 9 sa gabii nga sila makapangolekta.

Kaniadtong Martes, gitakda unta nga ang kadagkoan sa Tokagawa moatubang sa Cebu City Traffic Management Board, ug giandaman na unta nako og daghang pangutana, pero wa motunga.

Nanawag kuno nga karong Martes na sab sila motunga sa Traffic Board. Nagpadala man gud ang operations manager sa Tokagawa og suwat sa Traffic Board, ug nangangkon nga wa gyud kuno sila’y nahimong kalapasan.

Kana diay’ng pagpangolekta nila sa adlaw’ng Domingo ug sa oras nga lapas na sa alas 7 sa gabii, dili diay na kalapasan? Kaklaro diha sa Joint Venture Contract nga ang pagpangolekta og parking fee himoon lang gikan sa alas 7 sa buntag, hangtud sa alas 7 sa gabii!

Unya, nangolekta pa gyud og parking fees ang Tokagawa sa mga lugar nga wa maapil sa gitugot kanila sa kontrata. Pwede diay na? Daghan pa kaayo nga mga kalapasan nga unya ra nako ipangutana kanila kon moatubang na sila sa Traffic Board.

Kini hinoong tinguha nila, gawas sa Traffic Board, mag-agi pa ni sa Cebu City Council. Para nako, nganong apilon pa man gyud ang Domingo, wa na lay pahuway ang mga tag-iya’g sakyanan sa pagbayad og parking fees?