Kabalaka
Usa ka adlaw niana dunay edaran nga akong gikahinabi. Iyang gipabuhagay ang iyang mga kabalaka sa umaabot. Kining maong kahimtang maoy nakapaumol og mga ngil-ad ug mga makalilisang nga mga urom panahon sa iyang paghikatulog. Makakita siya mga sungayang mga tawo nga padayong naghamok kaniya. Bisan unsaon niya og singgit walay tingog nga mogawas gikan sa iyang baba. Dili makalihok ang iyang lawas ug nanggahi siya. Wala madugay ninggawas nga sa dihang buhi pa ang iyang bana, kulatado kaayo siya niini. Iyang mga anak wala na magtagad kaniya. Sa laktod nag-inusara na lamang siya. Butang nga gikabalak-an niya sa hilabihan.
Ako siyang gipahigmata ning mosunod:
1. Ang kinabuhi dili hingpit ang bugtong mahimo nato mao man ang pagdawat niini.
2. Ang kagahapon padayon niyang gibitbit nga maoy padayong naghamok kaniya.
3. Ang mga sungayan nga iyang nakita mao man kadtong mga dautang diwa niabuso kaniya ug nisamad sa iyang galamnhan, pagbati ug kalag. Angayan niyang buhaton mao nga pakigharongan kini uban ang dakong pagtuo nga ang Dios moluwas kaniya gikan sa maong kaulipnan.
4. Pinangga siya sa Dios ug mahinungdanon siya alang niini. Busa kinahanglang saligan niya ang iyang kaugalingon.
5. Ang tanang Krisis, suliran ug pagsulay lumalabay lamang ang magpabilin mao man ang atong Ginoo sa atong kiliran.
Human sa taud taud nga kahilom ako siyang giingnan nga papahawaon pinaagi sa grasya sa Dios ang mga sungayan nga nihasol kaniya diha sa iyang paghikatulog. Ginamit pag-ampo sa Eksorsismo batok sa mga demonyo nga nanghasi sa emosyon sa tawo ug ang pagbendita kaniya uban ang pahimangno nga modangop gyud sa Dios sa kanunay nibanos ang kalinaw ug kalingkawasan. Karon aktibo na siya sa mga kalihukan sa simbahan ug sa ilang Parokya., diin nahimamat niya ang mga bag-ong higala ug katilingban nga nidawat kaniya sa iyang pagkasiya.
Pag-Ampo
Nangamuyo kami Ginoo nga imo kaming luwason sa tanang dautan, hatagi kami sa kalinaw ning panahona aron tinabangan sa imong kalooy, mahalikay kami sa tanang sala ug mahilayo sa tanang kabalaka samtang nagpaabot kami nga malaumon sa pagbalik ni Jesukristo among Ginoo ug Manunubos. Amen.
- Latest
