Panglutos

Human magpatabang sa media ang upat ka mga regular nga kawani sa City Hall tungod kay wa silang sweldohi sud na sa 10 ka buwan, gisugdan na og proseso ang ilang sweldo.

Sigun nilang Sybil Ann Yba ez, Maria Almicar Diongzon, Filomena Atuel, ug Chito Dela Cerna nga gipirmahan na kagahapon ni City Assessor Theresa Rosell ang dokumento nga gikinahanglan aron sila masweldohan.

Apan dili ang tibuok 10 ka buwan ang mabayran sanglit daghan pa og proseso nga agian aron makobra nila ang unom ka buwan sa miaging tuig.

Matud sa upat ka mga kawani nga ang gilihok nga mabayran sa pagkakaron mao ang ilang sweldo gikan sa Enero hangtod sa Abril karong tuiga.

Ang Hulyo hangtod sa Disyembre sa miaging tuig kinahanglan pa kuno og resolusyon gikan sa konseho sanglit adto man kuhaon ang pundo sa budget sa miaging tuig.

Di makiangayon alang sa maong mga kawani nga mag-atubang na sab og laing posibling kalisdanan aron makobra ang kinatibuk-an nilang suholan.

Hinaot nga dunay konsehal nga motabang aron intawn mapaspasan sa konseho sa dakbayan ang gikinahanglan nga resolusyon alang sa sweldo niining mga pobreng kawani.

Tataw nga pagpangharass ngadto sa maong mga kawani ang wala pagsweldo nila tungod kay mibarog sa ilang katungod.

Kun mahinumduman ang maong mga kawani gibalhin ngadto sa laing mga buhatan dihang miasumir ang asawa ni City Administrator Collin Rosell isip city assessor.

Ang mga kawani nga nasayod sa ilang katungod ubos sa balaod, mikwestiyon sa ilang reassignment atubangan sa Civil Service Commission tungod kay gawas na sa ilang expertise ang bag-ong trabaho nga gihatag nila. Ang CSC mipabor sa upat ka mga kawani og mimando nga ibalik sila sa ilang trabaho.

Apan matud sa city administrator nagdumili kuno pagsunod ang maong mga kawani sa ilang reassignment hinungdan nalangan ilang sweldo.

Kun tinuod nga wala mosunod sa mando ang maong mga kawani, sud sa maong gidugayon nganong wala pa man sila mataktak sa trabaho?

Abogado man si Rosell ug tingali siya sayod nga ang pagdumili pagsunod sa kamanduan maisip nga insubordination ug mahimong basihan pagtangtang sa usa ka kawani.

Duna bay imbistigasyon nga gihimo ang dakbayan batok sa maong mga kawani? Kun wala, tataw nga palusot nalang ang gihimo ni Rosell aron tabunan ang ilang pagpanglutos sa maong mga kawani.