Atensyon DPWH

Kaniadtong buwan sa Pebrero, gipatawag sa kadagkoan sa Department of Public Works and Highways (DPWH) ang mga tagdumala sa JFAP Construction kay wa gyud nila ayoha pag-repair ang kabahin sa karsada gikan sa Lahug paingon sa Busay nga naguba tungod sa ilang proyekto.

Apil gani ko nga gipatawag unta kay nahiubos ang amigo nakong opisyal sa DPWH nganong giapil nako ang iyang nga n nga wa kaayo magtagad sa problema, pero wa ko makatambong sa maong miting kay duna sab ko y laing gitambongan.

Apan diha ko atol nga ang taga DPWH ug ang project engineer sa JFAP Construction mihimo og  actual inspection  sa Veterans Drive nga maoy ilang gikutkotan aron malubong ang dagkong mga tubo sa tubig alang sa MCWD.

Ang instruction sa DPWH nga kinahanglang gabsan sa JFAP Construction ang daplin sa ilang gisemento nga bahin sa karsada nga gitabon nila sa lungag nga ilang gikutkot nga anaa gilubong ang mga dagkong tubo sa tubig, unya ang ginabsan butangan og sealant.

Ang tumong niini aron ang tubig dili motuhop ngadto sa gisemento nga lungag ug dili dayon maguba ang karsada. Mitangdo ang JFAP sa kamandoan sa DPWH, apan hangtud karon wa pa nila kini mahimo. Dugay na kaayo sukad sa mao nga miting.

Nahadlok ko nga makalimtan na lang sab kining maong gimbuhaton. Nahadlok sab ko nga ang akong mga amigo sa DPWH makalimot na lang niini.

Mao kini ang tumong nga gihisgotan nako pagbalik kini nga isyu, kay daghan kaayong mga lungag nga wa gyud matapaki sa JFAP hangtud karon.

Wa ra nako ibutang ang inyong mga nga n engineer, kay basin magtoo na sab mo nga tuyo nakong gub-on ang inyong dungog. Dili kana maoy akong katuyoan, kondili, gusto ra nako ang maayo nga panerbisyo.

Maghuwat ko unsay kalamboan niining mao nga wa pa matuman nga saad sa JFAP Construction.

* * *

Kon gusto gyud sa kadagkoan sa Department of Education nga mabalik na ang karaang school-days nga Hunyo ang pagbukas sa klase ug matapos sa Hunyo, kinahanglang inighuman sa klase karong Mayo, mosugod dayon sila sa enrollment.

Nakasabot man ko nga dunay grupo sa mga magtutudlo didto sa Manila nga maoy mireklamo, ug gipasangil nga dili kuno isakripisyo ang bakasyon sa mga tinun-an, apan ang tinuod, ang ilang gikabalak-an nga silang mga magtutudlo maoy way bakasyon.

Ang mga magtutudlo atol sa bakasyon padayon man nga gisweldohan mao nga gusto nila nga duna gyuy duha ka buwan nga bakasyon.

Pero para nako, mas ninyo nga sugdan dayon ang klase sa Hunyo, aron nga mahuman na ang klase nga dili pa kaayo maabtan sa grabeng ting-init.