Dili diay basta basta makapalit og maintenance medicine

Imbes sawayon, angayan nga pasalamatan kadtong customer sa pharmacy nga nag viral karon sa social media human niya gi-post ang iyang kasinatian dihang mipalit siya og maintenance medicine ug gibalibaran siya sa pharmacist kay lagi walay resita.

Tungod sa gihimo sa customer nakahatag kini og awareness nga ang tanang tambal nga adunay RX gikinahanglan nga adunay reseta gikan sa doktor ayha kini mapalit.

Kadtong adunay kahibawo sa medisina or medical related field nasayod niini apan kadtong walay background sama nako, malay ko ba kong unsay buot ipasabot nianang RX nga reseta diay kana matud pa sa kadtong pharmacist, nakasabot ko sa customer kay posibleng wala pud to siya masayod sa pamaagi.

Tungod kay maintenance medicine nagsalig lang pud siya nga makasayon sayon ra og palit, sama gud sa kadaghanan pareha nako nga nag maintain og tambal nga kong mahurot mag over the counter dayon ug hatagan ra man usab.

Pareha sa gihimo sa customer maong nahibulong siya nga gibalibaran ug lagi kay maoy iyang nabatasan sa ubang pharmacy nisuway gyud siya og palit sa tulo ka mga dakong botika ug gihatagan siya.

Grabe ang iyang nadawat nga pagsaway sa social media nga bisan kadtong walay hanaw mipahit kaniya, bi sa tinood lang kitang mga walay hanaw sa medisina o unsay protocol sa pagpalit og tambal nasayod ba pud ta tanan nga sakto ang atong gihimo? sa tinood lang karon pa gani ko nasayod nga ang RX sign nga nabutang sa tambal resita diay.

Dili malalis dunay sayop ang customer kay iya man gi-videohan ang pharmacist ug gi post sa social media nga midyo lahap ra pud ang caption, apan kong atong tan-awon ang video wala man pud moingon ang pharmacist nga hunong ang video kay siya confident man nga sakto ang iyang gihimo ug ang customer ang mauwawan kong iya kining i-upload ug nahitabo gyud nga na-bash ang customer.

Angayan saludohan ang pharmacist nga nibarug sa iyang prinsipyo ug gigamit gyud ang iyang nakat-onan kay lagi kong magkapalpak ang iyang lisensya man ang maapeki. Samtang salamat sa customer nga nabuking ang ubang mga pharmacy nga pwede ra diay mapalit over the counter ang tambal nga nag require og resita.

Angayan nga tan-awon kini sa Food and Drug Administration kon FDA.