EDITORYAL - Opisyales sa gobiyerno ang maayong ehemplo

Ang Department of Environment and Natural Resources molusad karong adlawa sa ilang “Earth Day, Every Day” nga programa nga ang target mao ang pag-edukar ug pagtanom sa hunahuna sa mga kabataan ang pag-amping sa kalikupan. Gawas sa pagtanom sa hunahuna, gusto sa DENR nga puy-an ug mamahimo ng kabahin sa kinabuhi sa kabataan ang pag-amuma sa kinaiyahan ug kalikupan pinaagi sa pagtudlo kanila og nagkalain-laing pamaagi sap ag recycle sa mga basurang plastic, pagkolekta niini, pagbahig ug uban pa.

Nindot kaayo kini nga edukasyon ug dugang kahibalo para sa mga bata kung kini motuhop gyud sa ilang kinabuhi ug alimpatakan. Apan dili na kini bag-o nga programa, dugay na kining gihimo ug naglahi-lahi lang ang tawag o pangalan. Apan dili gihapon dako og impact sa kinatibuk-ang kahimtang sa kalikupan karon sa Pilipinas, daghang kabukiran ang nangaupaw, hugaw ang dagat, nangamatay ang mga sapa, mga umahan gihimong komersyal nga yuta ug daghan pang uban.

Ang pangutana kung ngano ni? Ang tubag niana, naa gihapon tanan sa gobiyerno ug sa tanang mga ahente niini gikan sa mga empleyado, opisyal man o yanong kawani ngadto sab sa mga elected officials.

Kay sila maoy dunay gahum aron sa pagpadayon niining tanan ug maniguro nga ang matag programa duna gyuy nakab-ot nga maayo para sa tumong.

Apan makita man gud sa mga kabataan nga mismo ang mga naa sa gobiyerno ug bisan diha sa mga eskuylahan mismo, wala man moseryuso sa buhat, pulos lang sa estorya ang mga hamtong nga mao unta ilang ehemplo.

Sa laktod pagkaestorya, menus kaayo ang mga maayong ehemplong kakuhaan og inspirasyon sa kabataan, mas daghan ang mga malapason ug nagpasagad sa kalikupan samtang gamay ra, o basin nakita nila nga sila rang mga kabataan ang nagtinarong.

Makita kini bisan sa mga barangay levels, ang mga barangay officials kuwang sa buhat o wala gyud sa binuhatan ang ilang mga gipamulong bahin anang saktong pagbahig sa basura ug paglabay niini subay sa Waste Management Act. Kung duna may nilihok, kuwang kaayo og dedikasyon, Basta lang maka-comply sa gipangayo apan kutob ra didto. Matud pa lagi sa panultihon, mas maayong sa bata pa ang kawayan tul-iron na kini aron mapuslan ini og abot sa panahon. Apan kaning kawayan sama kini og usa ka barangayan, daghan punoan sa usa ka tapok.

Kaning mga gagmay nga dabong (saha sa kawayan) kun anha motubo tunga-tunga sa tapok sa kawayan nga kadaghanan bawog na o baliko ug guwang na, maapektahan gyud ang pagtubo sa sunod nga kawayan kay maapil sila og kabaliko.