Maglisod nag balik
Kampo ni kanhi Presidente Rodrigo Duterte nideklarar nang Cebu City Mayor Mike Rama nga maoy labing uwahing biktima sa Malakanyang tungod sa iyang pag-apil sa ilang rally sa South Road Properties (SRP) niadtong Pebrero.
Para sa mga dumadapig ni Duterte si Rama ang nisunod ni Davao del Norte Gov. Edwin Jubahib, nga giingon nilang maoy unang gisuspenso tungod sa paghatag og permiso sa ilang rally.
Nitakdo ang ilang pasangil sa pagduda ni Rama nga dunay nangintriga batok niya nga posible nga nakakumbinser ni Presidente Ferdinand Marcos Jr. sa pagduda niya.
* * *
Pila ka adlaw sa wa pa masuspenso si Rama, daghang nahibulong nga nagsige siya og post sa social media sa pagpadayag og hingpit nga suporta sa administrasyong Marcos. Iyang gipasaligan niya si Marcos nga siya ang iyang presidente.
Niingon si Rama nga nakabati siya og kasayuran nga dunay mga pasangil nga niabot sa Malakanyang nga nagbudhi siya ug tua na magpaluyo sa mga kaatbang sa administrasyon. Wa hinuon maghisgot si Rama og mga detalye sa pasangil ug sa mga ngan sa gidudahan nga mga namasangil.
* * *
Pipila ka lokal nga opisyal sa Sugbo niingon nga human sa rally ni Duterte sa SRP, gipangutana sila sa kadagkoan sa Department of Interior and Local Government (DILG) kon gawas ni Rama duna ba silay nahibaw-an nga uban pang lokal nga mga opisyal nga nitambong sa kalihokan.
Naabtan bang Malakanyang og tulo ka buwan una nakumbinser nga ang pagtambong ni Rama sa rally di lang paukyab kon dili tungod sa mas lawom niya nga suporta ni Duterte pinaagi sa ilang partido?
* * *
Nikumpisal si Rama nga nisuway siya sa pagpakigsulti ni Marcos Jr. parte sa iyang pagkasuspenso. Pero wa siya molampos. Busy ba lang ang presidente? O gilikayan niya si Rama? O giisip na si Rama nga tua kapusta sa pikas?
Maklaro sa mosunod nga mga adlaw kun giisip pa ba sa Malakanyang nga alyado si Rama. Ang kahilom sa mga konsehal ug mga kapitan sa Cebu City sa iyang pagkasuspenso di maayong timaan sa iyang dangatan.
Kun mabantang nga wa lang mangiyugpos kun dili niapil gyud ang Palasyo pag-apiki niya, mahimong maglisod si Rama pagbalik sa City Hall.
* * *
- Latest
