Benefits sa breast cancer pinalawak ng PhilHealth
May dahilan para magalak ang mga pasyenteng may breast cancer na kasapi sa PhilHealth. Opisyal nang inanunsiyo ng ahensiya ang pagtataas sa benepisyo para sa mga may ganitong karamdaman sa inilabas na circular 2024-0007 noong Marso 24 ng taong ito at nagkabisa na mula pa noong katapusan ng nasabing buwan.
Saklaw ng naturang policy ang surgery o operasyon, gamot na kakailanganin at ang mga gagawing therapies. Layon nito na mabawasan ang pasaning pinansiyal at magkaroon ng napapanahong pagtukoy sa sakit upang maagap na magamot. Malaking bentahe ito sa mga pasyente at kanilang pamilya.
Patunay ito na isinusulong ng PhilHealth ang commitment nito na palawakin ang benepisyo para sa mga miyembro alinsunod sa itinatadhana ng Universal Health Care Law. Ang enhanced package ay nakasandig sa programang Pinalawak at mga Bagong Benepisyo para sa Mamamayang Pilipino na inilunsad ng ahensya.
Ang mga kuwalipikadong pasyente ay maaaring makinabang sa Z benefit for Breast Cancer na sasagot sa kanilang gastusin hanggang Php 1.4 milyon. Sa napapanahong hakbang na ito ng PhilHealth, talagang damang-dama na ng mga miyembro ang benepisyo.
Sakop ng pakete ang diagnostic tests, surgery, gamot at therapy na kakailanganin ng pasyente. Dati, tanging ang mga kaso ng cancer na nagsisimula pa lang ang sakop ng benepisyo. Ngayon, kasama na rin ang mga malalang kaso ng breast cancer (stage 3 at 4), maging yang mga kasalukuyan nang ginagamot basta pasado sa mga criteria na nakasaad sa guidelines.
Ang mga benepisyong ito ay matatamo ng mga pasyente o miyembro ng kanilang pamilya mula sa mga kinontratang ospital at pasilidad ng PhilHealth. Upang malaman ang mga facilities na ito, magtungo lang sa website ng PhilHealth sa www.philhealth.gov.ph. o tumawag sa PhilHealth Action Center sa (02) 8662-2588. Maaaring tawagan ang numerong ito kahit kailan o anumang oras (24/7).
- Latest