Swedish national nakalas sa sunog sa Talisay

CEBU, Philippines — Usa ka langyaw ang nakalas sa sunog nga niulbo sa may Barangay San Isidro Dakbayan sa Talisay, Huwebes sa gabii.

Pasado alas siete sa gabie nadawat sa kabomberohan sa Dakbayan sa Talisa yang sunog nga niulbo sa may Largo Compound sa maong barangay.

Usa ka panimalay ang nasunog diin giisa kini ngadto sa 1st alarm ug hingpit nga napalong sulod lang sa 30-minutos nga pakigkombate sa kabomberohan ug wala ra hinoon kini nakatapon sa ubang panimalay apan 68-anyos nga Swedish national nga si Martin Ask  na trap sa balay ug naapil kini og kasunog.

Giingong naglubog na sa higdaanan tungod sa sakit ang maong biktima.

Ang maong sunog gisusi pa usab pag-ayo sa kabomberohan nga gipangulohan ni FO3 Junriel Siaboc ang Chief Investigator sa Talisay City Fire Station.

Sa inisyal nga pakisusi giingong didto nagsugod ang kalayo sa kisame sa kwarto sa biktima nga mikatap sa tibuok pinuy-anan niini.

Girekomendar sa kabomberohan nga ipa autopsy ang patay nga lawas sa biktima aron masayran kung wala ba kini foul play.  Ang maong sunog gibana-bana nga moabot ang danyos ngadto sa P1.6 milyon.

Gisusi usab sa kabomberohan nga faulty electrical wiring ang hinungdan sa pag-ulbo sa sunog nga nahitabo.

Samtang sa General Echavez, Barangay Lorega sa Dakbayan sa Sugbo, usa ka balay ang diriyot maugdaw kung wala pa dayon matabang sa mga tawo ug bombero kagahapon sa buntag. Ang kabomberohan padayon nga niawhag sa katawhan nga magmatngon sa kanunay ilabi na nga nasinati karon ang grabeng kainit sa panahon. --  IBM BANAT NEWS