Mga traffic enforcer gitugotang makapalandong

CEBU, Philippines — Ang Road Management Authority/Cebu City Transportation Office nipatuman og lakang aron dili mabutang sa peligro ang ilang mga tawo sa karsada.

Ang mga traffic enforcer direkta kining mabuwad sa adlaw samtang magmando sa dagan sa trapiko.

Usa ka traffic enforcer ang nabantayan nga nagmando sa trapiko diha sa dalan Colon bisan sa naglagiting nga kainit sa adlaw.

Ang maong traffic enforcer nagkanayon nga aron makasigurado siya nga makaagwanta sa kainit magdala siya kanunay og tubig nga iyang mainom.

Gibutyag sa nahisgutang traffic enforcer nga gihatagan sila og kahigayonan sa ilang labaw nga magpalandong kon mabatyagan nila ang kagrabeng init sa panahon.

Ang pangulo sa RMA-CCTO Raquel Arce, nibutyag usab nga ilang gipamub-an ang oras nga mabuwad sa adlaw ang mga traffic personnel tungod sa grabeng kainit karon sa panahon.

Giklaro ni Arce nga mahimong makapangita og landong ang mga road managers apan gikinahanglan nga visible ang ilang pwesto ug gikinahanglan nga “on the go” sila kanunay kon adunay problema sa mga sakyanan sa karsada tungod kay mao kini ang ilang trabaho.

Nikabat ngadto sa 300 ka traffic enforcers ang RMA-CCTO ang gitahasan sa pagpatuman sa kahapsay sa dagan sa mga sakyanan diha sa kadalanan sa Dakbayan sa Sugbo. BDB BANAT NEWS