CPA gipadalhan og notice of violation sa DENR-EMB-7

CEBU, Philippines — Ang Department of Environment and Natural Resources - Environmental Management Bureau (DENR-EMB) -7 niduso og notice of violation batok sa Cebu Port Authority (CPA) tungod sa giingong pagsugod og expansion sa Cebu Coastal Road nga walay compliance certificate.

Ang maong notice giluwatan sa DENR-EMB-7 niadtong Abril 2, 2024 subay sa reklamo nga gisang-at sa Cebu City Environment and Natural Resources Office pinaagi sa Cebu City Legal.

Ang nahisgutang notice gi-address ngadto kang Leonilo Miole, general manager sa CPA nga nagmando kanila sa pag-esplika aron dili sila silotan sa maong kalapasan ug dili ipahunong ang operasyon sa proyekto.

Tipik usab sa maong notice nagkanyon nga ang CPA giingong nakalapas sa Presidential Decree No. 1586 kun “Philippine Environmental Impact Statement System” ug ang Implementing Rules and Regulations (IRR) niini.

Kini base sa gihimong pakisusi sa mga technical personnel sa DENR-EMB-7 niadtong Marso 21, 2024 diha sa CPA base port isip tubag sa reklamo ni CCENRO head, Reymar Zamora Hijara.

Atol sa maong pakisusi nasuta nga ang giingong kalapasan sa CPA pagpalapad sa proyekto sa Cebu Coastal Road nga walay giamendahan nga Environmental Compliance Certificate (ECC) sa Section 9 sa P.D. 1586 ilabina ang kondisyon sa ECC No. 16.

Sa laing bahin, si Mayor Michael Rama nagtuo nga usa ra ang nagpaluyo sa kasamok nga dala sa CPA ug Metropolitan Cebu Water District batok sa iyang administrasyon.

Natuo si Rama nga adunay mga tawo nga nagsige og hulhog ngadto sa Malacañang kalabot niini human sila si Atty. Jose Daluz III ug mga kauban niini sa MCWD board ang pabilin gihapon nga nagmagahi nga mobiya sa ilang pwesto.

Si Rama nihagit sa contractor sa CPA sa pagsulti sa nagpaluyo sa maong proyekto tungod kay nagpadayon gihapon kini sa ilang trabaho bisan og aduna kini mga nahimong kalapasan sama sa kakuwang sa mga dokumento ug sa pagsunod sa environmental compliance certificate.  BDB BANAT NEWS