Sugod na’g kampanya

Pagka karon pa lang gani, makita na nato nga adunay upat ka politikanhong pundok kang kansang mga kandidato ang mag-ilog sa mga pwesto dinhi sa Dakbayan sa Sugbo.

Ang maong mga politikanhong grupo nagpaila na kon kinsa ang ilang mga kandidato sa pagka mayor, bise mayor, samtang sa mga konsehal dili pa kaayo klaro kon kinsa.

Gani, ang ubang grupo misugod na pagsuroy-suroy sa kabarangayan panahon sa kagabhion ug mipahigayon sila og mga pakigpulong atol sa gipasiugdahan nilang mga Bingo.

Nasayran nako nga ang pundok nila ni kanhi Cebu City Councilor Joey Daluz III ug karon Basak-Pardo Barangay Kapitan Dave Tumulak taudtaud na diay’ng nagsuroy sa mga sityo.

Si Daluz maoy kandidato pagka mayor sa ilang grupo samtang si Tumulak modagan pagka bise mayor. Si Tumulak midagan pagka mayor sa miaging eleksyon, apan napilde.

Ang laing grupo nga moapil sa politika ug modagan pagka mayor dinhi sa Cebu City gipangulohan ni kanhi PDEA regional director Yogi Ruiz. Wa pa siya’y bise apan may pipila na nga mopadayag nga magkonsehal ubos sa iyang grupo.

Si Cebu City Councilor Nestor Archival maoy gituboy ni kanhi mayor Tomas Osmeña nga padaganon pagka mayor sa BOPK, kay si Osmeña maoy mag-bise mayor.

Ang maong mga kandidato maoy ikasangka ni Cebu City Mayor Michael Rama nga mipahibawo na nga magpapili siya pag-usab sa katungdanan.

Si Cebu City Vice Mayor Raymond Alvin Garcia maoy ka-tandem ni Mayor Rama. Mahulagway nga makalingaw ang piniliay karong sunod tuig dinhi sa Cebu City.

Wa pa kita masayod kon niining umaabot nga mga adlaw, duna pay ubang grupo nga mokalit lang pagpahibawo nga modagan usab sila sa mga katungdanan dinhi sa siyudad.

Tinuod, layo pa ang eleksyon kay unya pa man kini sa Mayo sunod tuig, apan kinahanglang magpaila na ang mga gustong mokandidato kay karong Oktubre, mosang-at na sila sa ilang Certificates of Candidacy sa Comelec.

Dunay nangutana kon maayo pa nga daghan ang mga kandidato nga managan sa katungdanan sa kagamhanan? Akong gitubag ang nangutana nako pinaagi sa pagpasabot.

Nindot kon daghan ang mga kandidato nga atong kapilian kon kinsa gyud ang tugyanan nato sa pagdumala sa renda sa kagamhanan.

Apan kinahanglang ang mga botante maantigo gyud nga mopili kon kinsa sa mga kandidato ang maayong pilion kay dunay mga tawo nga maayo kaayong manulti atol sa kampanya, apan dili makamao motuman sa mga saad kon makadaog na.

Mao kini ang rason nga kon dunay mangampanya diri sa among lugar, motambong gyud ko aron hashasan ang pagkatawo sa maong mga gustong magpapili sa katungdanan sa kagamhanan.