OK ra nga dili mag-panty

Gisugyot ni kanhi Department of Health secretary ug karon kongresista sa Ilo-ilo nga si Jannette Garin ngadto sa kababayen-an nga dili mag-panty kun anaa ra sa ilang mga panimalay aron makalikay sa fungal infections nunot sa nasinati karon nga grabing kainit sa panahon.

Apan ang Department of Health kaniadtong Martes misugyot sa kababayen-an sa pagsul-ob og panty nga hinimo sa gapas aron makalikay kini sa fungal infections.

Sa gipahigayon nga pagdungog sa Senado, giangkon ni DOH Secretary Teodoro Herbosa ang katinuod sa tambag sa kanhi DOH secretary tungod sa pagkadali nga maigo sa mga babaye sa fungal infection panahon sa ting init sama sa candidiasis o itchiness.

Gipasabot ni Secretary Herbosa nga ang kainit sa panahon makamugna og singot sa pribadong bahin sa babaye nga makamugna og candidiasis o itchiness. Tambag niya sa mga babaye nga nagka-cndidiasis mao ang pagsul-ob og panty nga hinimo gikan sa gapas kay dili kini makapamuot sa singot, kana kun dili sila gusto nga dili magsul-ob og panty.

Tungod sa kainit sa panahon, una na nga gisuspenso sa Departamento sa Edukasyon ang atubangay nga klase lukop nasud diin kasagaran niini anaa sa Metro Manila. Gibana-bana sa PAGASA nga ang kainiton sa panahon kagahapong adlawa Miyerkulas anaa sa 43 degree centegrado. Kining maong kainiton mao usab ang nasinati sa ubang bahin sa nasud.

Ang PAGASA miingon nga ang kainiton sa panahon moabot kini gikan sa 42 ngadto na sa 51 degrees centegrado nga makamugna og heat cramps ug heat exhaustion nga magdala ngadto sa heat stroke kun madugay sa pagkabuwad sa adlaw.

Dili lang sakit ang gidala sa kainit kun dili nagdala usab kini og dakong kadaut sa pananom o agrikultura. Busa, dili gayod magkumpiyansa. Mas maayo nga sundon ang tambag sa mga haniti o eksperto aron malikay sa peligro ang atong kinabuhi.

Sa kababayen-an, kun unsa man ang para kaninyo nga makaayo hala sunda. Ayaw lang huna-hunaa ang malisya kay kanang malisya dili na makaluwas ug dili na makapalikay nimo sa sakit.