Asawa gibun-og, gitionan og pusil sa bana

Dear Atty. Divine,

Duna koy pangutana labot sa  akong  bana nga kusog kaayo manapat  nako ilabi na kun mag-away mi o mahubog siya. Dugay nako nga nag-antos aning akong bana kay gawas nga manapat siya, kusog sab siya manginsulto ug  mopasakit og estorya. Unsay akong buhaton aron mahunong na ni siya? Unsay kaso nga angay nakong ipasaka? Daghang salamat. -- Katherine

* * *

Hi Katherine,

Kinahanglan gyud ka nga mohimo og legal nga lakang aron mahunong na kining iyang pag-abuso kanimo. Ang una nimong buhaton mao ang pagdangop sa inyong barangay ug sa pagpangayo og Temporary Protection Order aron di na makaduol kanimo ang imong bana, imo sab nga ipa blotter ngadto sa Police Station ang gihimong pagbun-og kanimo. Magpa medical exam sab ka aron aduna kay ebidensya nga mopamatuod nga ikaw gidapatan niya og magpa examine sab ka og psychologist aron pagmatuod nga nakahatag kanimo og dautang epekto ang iyang gihimong pagpangabuso. Human niini, imong sulti-an ang police diin ka nagpa-blotter nga magpatabang ka sa pagpasaka og kaso batok sa imong bana.  Kasong kalapasan sa Republic Act 9262 kon Anti-Violence against Women and their Children ang imong ipasaka batok kaniya tungod kay ang pagbun-og sa asawa o live-in partner ug pagpasakit og estorya  usa kana ka physical abuse ug psychological abuse. Modangop sab ka sa korte alang sa Permanent Protection Order aron di na gyud makaduol kanimo ang imong bana. Hinaut nga imo kining buhaton dayon alang sa imong safety og protection. Thank you and God Bless.

Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.